Uyghur élide xitay kompartiye ezalirining sani köpeytilmekte

Shinxu'a'ing bu heqtiki sanliq melumatlirida körsitilishiche, az sanliq millet partiye ezalirining sani 521200ge yétip, pütün partiye ezaliri sanining 38.16%Ni igiligen hemde 2006 - yilidikige qarighanda, 64300 adem köpeygen, köpiyish nisbiti 14.07 % Bolghan.

Xitay partiye da'irilirining bu sanliq melumatliridin melum bolushiche, nopus boyiche hésablighanda, Uyghur qatarliq xitay emes milletlerning nopusi xitay nopusidin artuq bolushigha qarimay, yenila kompartiye ezalirining asasiy nisbitini xitaylar igiligen.

Tarixiy uchurlargha tayan'ghanda, xitay kompartiyisi 1949 - yili, 10 - ayda Uyghur élini igiligiche bolghan ariliqta Uyghurlar arisida xitay kompartiyisige eza bolghanlar yoq idi. 1949 - Yili, 10 - ayda seypidin eziz Uyghurlar ichide tunji bolup, xitay kompartiyisige iltimas yazghan hemde deslepki qedemde seypidin bashliq 10 nechche neper Uyghur qatarliq xitay emes millettin kélip chiqqan rehbiri shexs xitay kompartiyisining ezaliqigha qobul qilin'ghan idi.Ene shuningdin kéyin mexsus Uyghur partiye ezalirini köpeytishke kirishilgen bolup, kompartiye ezaliri xitayning Uyghur éli weziyitini kontrol qilip, bu jaygha qaratqan türlük bashqurush we özgertish tedbirlirini ishqa ashurushta muhim tayanch küchke aylandurulghan idi.

Közetküchiler hazir xitaydiki emeldarlar arisida chiriklik, parixorluqning ewji éliwatqanliqi, puqralarning kompartiye emeldarlirigha ishenmeydighan weziyet shekillinip, xitayning ichkiri sheherliride da'im dégüdek keng kölemlik naraziliq namayishliri bolup turiwatqanliqi, béyjing rehberlirining kompartiyining istilini yaxshilash shu'ari bilen birge xitay milletchilikini bekrek teshwiq qiliwatqanliqini otturigha qoyushmaqta