Xitay, 2009 - yilidin étibaren az sanliq millet yuqiri derijilik ixtisas igilirini terbiyilimekchi

Xitay hökümiti 2009 - yili pütün memliket boyiche 12 ölke we aptonom rayonidin 4700 neper yuqiri derijilik ixtisas igisi terbiyilesh pilani tüzgen bolup, bu sanning ichide magistirlar 3700 neper, doktorlar 1000 neper bolidiken.
Muxbirimiz ümidwar
2008-12-21
Élxet
Pikir
Share
Print

Xitay hökümet axbarat wasitilirining teshwiq qilishiche, mezkur 4700 neper az sanliq millet xadimi xitay döletlik ma'arip nazariti békitken béyjing uniwérsitéti, chingxu'a uniwérsitéti qatarliq pütün xitay boyiche 94 aliy mektepte terbiyilinidiken.

Hazir bezi jaylarda tizimgha aldurush ishliri bashlan'ghan bolup, yash cheklimisi boyiche alghanda magistirliq üchün oquydighanlar 40 yash, doktorluq unwani üchün oquydighanlar 45 yashtin ashmasliqi kérek. Tallinish nishanliri, asasliqi ichkiridiki "shizang sinipliri", ichkiridiki "shinjang sinipliri", milliy aliy mektepler, az sanliq millet magistir oqughuchilirini terbiyilesh baziliri qatarliq orunlarda xizmet qiliwatqan oqutquchilar hem bashqurghuchi xadimlardin bashqa yene %10 etrapida yuqiriqi sahelerge munasiwetlik bolghan xitaylardin ibaret iken.

Bulardin bashqa yene aliy mekteplerde ishlewatqan magistirliq unwani üchün oqush tarixi bar hemde oqush püttürüsh aldida turghanlarmu özini tizimlatsa bolidiken. Lékin xewerde, az sanliq millet rayonigha bérilidighan san nisbiti we millet terkibining qandaq bolidighanliqi éytilmighan bolup, öz ismini ashkarilashni xalimighan bir Uyghur ziyaliysining éytishiche, gerche Uyghurlar Uyghur aptonom rayonidiki asasliq millet bolsimu, biraq, Uyghurlargha qoyulidighan yuqiri xenzu tili sewiyisi we chet'el tili sewiyisi hem idiyisi sewebler tüpeylidin hökümetning mezkur siyasitidin yenila köpligen Uyghurlar behrimen bolalmaydighanliqi, uning eksiche Uyghur aptonom rayonigha teqsim qilinidighan sanning mutleq köp qisimini ishlepchiqirish qurulush armiyisi, xenzular we bashqa xitay tilida ma'arip terbiyisi körgen bashqa az sanliq milletlerning igilep kétishi mumkinlikini otturigha qoydi.


Toluq bet