Astanida xitay puqraliri we xitay muhajirlar söhbet yighini échildi

Yighinda wekiller xitay-qazaqistan dostluqining ikki dölet puqralirigha élip kelgen utuq we netijilirige medhiyiler oqughan. Xitay yillardin béri muhajir Uyghurlarni öz qoynigha tartish arqiliq, öz dölitidiki milliy mesililerni yoshurushqa urunup kelgen؛ emma mutleq köp sandiki muhajir Uyghurlar xitayning bu xeyrixahliqlirigha perwa qilmighan we özini uningdin uzaq tutup kelgen.

Astanida échilghan bu qétimqi söhbet yighinining xewer we resimliridin qarighanda, yighinda qazaq muhajirlar asasliq salmaqni igiligen, bular asasen qazaqistan musteqil bolghandin kéyin, Uyghur élidin chiqip ketken qazaqlar bolup, bularning nöwette muhajirettiki sherqi türkistan milliy herki'itide anche aktip emesliki melum . Yighinda yene buningdin 100 nechche yil ilgiri hijret qilghan birnechche Uyghur we tun'gan wekilmu orun alghan.

Bulardin qarighanda, xitayning qazaqistandiki muhajirlar xizmitide, nopus jehette asasliq salmaqni igileydighan we nöwette almata we yarkent etrapida yashawatqan Uyghur muhajirlarni öz qoynigha tartishtin ümidsizlen'genliki, qazaqistandiki muhajirlar arisidin shérik toplashta nishan we pilanlirida özgirish boluwatqanliqi bayqalmaqta.