Xitay ölkiliride siyasiy islahat telepliri yükseldi, Uyghur élide 18-qurultay rohini öginish kursi bashlandi

Qurultay rohini öginishke herqaysi jaylardiki nazaret derijilik rehbiri kadirlar we nahiyilerning partiye-hökümet kadirliri orunlashturulghan. Uyghur rayonluq partkom bash sékrétari jang chünshyen kursning échilish murasimigha özi biwasite qatniship, söz qilip, 18-qurultay rohini Uyghur élining emeliyitige birleshtürüshni, Uyghur élining istratégiyilik ehmiyitini chongqur tonup yétip, menggülük eminlikni qet'iy ishqa ashurushni telep qilghan.

Junggo xewerler torining xewiridin qarighanda, jang chünshyen menggülük eminlikni ishqa ashurush üchün Uyghur élining zamaniwilishishi, sana'etlishishi, pen-téxnikilishi, béyishi kéreklikini otturigha qoyghan, emma Uyghur élide muqimsizliqning négizi dep körsitiliwatqan milliy tengsizlikni hel qilish, aptonomiye qanunlirini heqiqiy türde ijra qilishqa oxshash mesililerni bolsa tilgha almighan.

Halbuki, Uyghur éli weziyitini közetküchiler Uyghur élidiki muqimsizliqning Uyghur éli iqtisadini yuqiri kötürüsh bilenla hel bolmaydighanliqi, Uyghur élining siyasiy hoquqliri kapaletke ige bolmay turup xitay hökümitining rayonda menggülük eminlikni berpa qilish xiyalining ishqa ashmaydighanliqigha ishinidu.

Uning üstige, 18-qurultay ayaghlashqinigha xéli bolghanda we xitayning bashqa ölkiliride hedep partiyini siyasiy islahatqa chaqiridighan türlük ammiwi pa'aliyet-heriketler köpiyip qalghan bir mezgilde, Uyghur élide bu kursning échilishi közetküchilerning diqqitini qozghidi.