Xitay bir mutexessisni jasusluq bilen eyiblep ölüm jazasigha höküm qilghanliqtin tenqidke uchridi

Bu yil 59 yashlardiki wu wéyxenning awstiriye tewelikidiki qizi chén ren, dadisigha bérilgen ölüm jazasining jüme küni etigende ijra qilin'ghanliqini, xitay da'irilirining dadisini ölüm jazasidin kechürüp qélish heqqidiki ötünishige qulaq salmighanliqini, özining xitay adalet séstimisidin ümidsizlen'genlikini bildürgen. Amérikining béyjingdiki elchixanisi wu wéyxenning jazasi ijra qilin'ghanliqini aydinglashturup, ölüm jazasini shiddetlik eyibleydighan bayanat élan qildi.

Amérika elchixanisining bayanatchisi suzan stéwénson mundaq deydu": biz xitay hökümitining wu wéyxen'ge bérilgen ölüm jazasini ijra qilghanliqidin nahayiti qattiq chöchiduq we ümidsizlenduq." Wu wéyxen xitay puqrasi bolup, u ilgiri bir mezgil awistiriyide yashighan, 2005 ‏ - yili teywen'ge axbarat yetküzüsh bilen eyiblinip qolgha élin'ghan idi.

Wu wéyxenning qizi chén ren, eyibnamiside dadisigha artilghan jinayetlerning biri xitay rehberlirining salametlik ehwaligha a'it mexpiyetlikni ashkarilighan bolushi mumkin, dégen perezge tayan'ghanliqini bildürgen. Wu wéyxenning dilosi dunya jama'etchilikining diqqitini qozghighan bolup, mezkur dilogha awstiriye prézidénti xéyniz fishir, amérika tashqi ishlar ministiri kandiliza rayis qatarliqlar arilashqan we xitay da'irilirining wu wéyxenni kechürüm qilishini telep qilghan idi.

Awstiriye tashqi ishlar ministiri ursila plasnik jüme küni bu weqeni yawropa ittipaqigha qaritilghan "aldin'ala pilanlan'ghan qiltaq", dep tenqid qildi. U mundaq deydu": uning ölüm jazasining xitay - yawropa kishilik hoquq söhbiti ötküzülidighan künning aldigha toghrilinishi kishilik izzet - hörmetning yoqluqini, bu déloning bir terep qilinish usulidiki qopalliqni namayen qilmaqta."

Lékin xitay tashqiy ishlar ministirliqi bayanatchisi chin gang ölüm jazasini aqlap, wu wéyxenning xitay qanunini buzghanliqini, uning "chet'ellik uruq - tughqanlirini, dep alahide imtiyaz bérilmeydighanliqi"ni bildürgen.