Хитайдин кәлгән пахта териш қошуни уйғур елидин милярд пул тепип кәтти

Бу йил авғустта уйғур елигә хитайниң гәнсу, хенән, ниңша, вә сичуән қатарлиқ өлкилиридин бир милйонға йеқин хитай пахта теришқа кәлгән иди. Бу пахта териш қошуни нөвәттә пәсиллик әмгикини аяғлаштуруп юртлириға қайтишқан болуп, ноябир кириши билән уйғур елидин хитайға қатнайдиған пойиз вагонлири пахта терип қайтқан аққунлар билән тошмақта.
Мухбиримиз гүлчеһрә
2008-11-04
Елхәт
Пикир
Share
Принт

Тәңритағ ториниң хәвиригә қариғанда "ғәрбни ачимиз, тәрәққий қилдуримиз, байлиқ бәрпа қилимиз " дегән шоарни көтүривалған бу бир милйон әтрапидики пахта териш қошуни 70 күн җәрянида уйғур елидин җәмий бир милярд йүән пул тепип юртлириға елип кәткән.

Хәвәргә қариғанда бу йил биңтуән кевәзликлиригә ишләмчиликкә кәлгән пахта териш қошунидики бир милйон ишләмчиниң 700 миңдин көпрәки хитай өлкилиридин, қалған 228 миңи уйғур елиниң һәр қайси җайлиридин кәлгән пәсиллик ишләмчиләр икән.

Бултурму пахта тәргүчиләрниң тапқан иш һәққи бир милярд 430 миң йүәнгә йәткән. Уйғур ели хитайниң әң чоң пахта базиси. Бу пахта базилири асасән хитай биңтуән деһқанчилиқ мәйданлирида.

Нөвәттә биңтуәнниң кевәз терилғу мәйдани йәттә милйон 850 миң моға йәткән болуп, пахта териш мәзгилидә хитай һөкүмити тәрипидин биңтуәнигә һәр йили бәш йүз миңдин артуқ хитай аққунлири пахта теришқа елип келиниватқан болса, әксичә уйғур елиниң ешинча әмгәк күчлири хитай өлкилиригә йөткәлмәктә.

Хитай даирилириниң бу хил ишләмчи йөткәш сиясити уйғурлардила әмәс пүтүн дуняда гуман һәм наразилиқ пәйда қилмақта.

Пикирләр (0)
Share
Толуқ бәт