Уйғур дияридики гуаңхуй ширкити қазақистан билән тәбиий газ келишими түзди

Хитайниң қазақистан билән болған енергийә һәмкарлиқлири үзлүксиз түрдә күчәйтилмәктә. Илгиридин тартип һазирғичә қазақистан билән хитай арисидики нефит вә тәбиий газ содиси вә һәмкарлиқиға хитай дөләтлик баш нефит вә тәбиий газ ширкити игә болуп кәлгән болса, өткән җүмә үрүмчи шәһиридә хусусийлар игидарчилиқидики гуаңхуй ширкити қазақистанниң TBM енергийә ширкити билән һәмкарлиқ келишими түзгән.
Мухбиримиз үмидвар
2008.12.21

Шинхуаниң тарқатқан хәвиридә ейтилишичә, келишимни имзалаш мурасимиға уйғур аптоном райони партком муавин секретари һәм уйғур аптоном райониниң даимий ишлар бойичә муавин рәиси яң гаң қатнашқан шуниңдәк қазақистан TBM ширкитиниң лидери қатарлиқлар билән көрүшкән.

Яң гаң қазақистанлиқларға уйғур аптоном райониниң иқтисадий тәрәққият әһвалини тонуштуруш билән енергийә саһәсидики һәмкарлиқни күчәйтишниң зөрүрлүки вә әһмийитини тәкитлигән шуниңдәк аптоном районниң уларниң һәмкарлиқлирини қоллайдиғанлиқини изһар қилған.

Гуаңхуй ширкити билән т б м ширкити алтайда 8 йүз милйон куб метир суюқлаштурулған тәбиий газни бир тәрәп қилалайдиған завут қуруш һәмдә бирликтә нефит вә тәбиий газлиқларни тепиш һәм ечиш елип беришқа пүтүшкән.

TBM Қазақистанниң әң чоң хусусий нефит ширкити болуп һесаблиниду. Қазақистан өктичилири қазақистанниң енергийә саһәсидики содисиниң президент аилә - тавабиатлири һәм җәмәти билән мунасивәтлик икәнликини тәнқид қилмақта.

Нөвәттә, қазақистан билән уйғур дияри арисида нефит турубиси мәвҗут болуп, тәбиий газ турубисиниң 2009 - йили ишқа кириштүрүлидиғанлиқи ейтилған . Қазақистан хитайниң оттура асиядики әң чоң енергийә шерики вә сода шерики болуп һесаблиниду.
 

Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.