Xitay 2012 - yilgha qeder Uyghur éli ma'aripni qosh tillashturushni %85 tin ashurmaqchi

Xitay hökümiti Uyghur élining qosh til ma'aripigha ajratqan bu mexsus meblighi bilen 2012 - yilgha barghanda Uyghur élide az sanliq millet ma'aripining qosh tillashturulushini %85 tin ashurushni pilanlighan. Bolupmu mebleghning köp qismi Uyghur élide qosh til yeslilirini qurushqa serp qilinidighan bolup, buning bilen az sanliq millet balilirining deslepki ang terbiyisidin bashlapla xitay tilini öginishini omumlashturidiken.

Buning bilen teng yene, xitay hökümiti,xitay ölkiliride échilghan "shinjang toluq ottura sinipliri"gha hemde Uyghur éli ichidiki xitay mekteplirige échilghan toluqsiz ottura siniplirigha qobul qilinidighan oqughuchilar kölimini ashurushni on birinchi besh yilliq pilanigha kirgüzgen.

Yeni bu yildin bashlap xitay ölkiliridiki shinjang siniplirigha yene 1000 oqughuchi köpeytip qobul qilin'ghandin bashqa, Uyghur élidiki xitay ottura mektepliride tesis qilin'ghan toluqsiz ottura siniplirida oqutilidighan az sanliq millet balilirining sanini 8000 ge yetküzmekchi.

 Nöwette, Uyghur élining barliq yéza - kent, qishlaqliridimu qosh tilliq yesliler quruluwatqan bolup, yerlik da'iriler qosh tilliq yeslilerde oqutulmighan balilarning, oqush yéshigha toshqandimu mektepke qobul qilinmaydighanliq sherti bilen ata ‏ - anilarni balilirini üch yashtin bashlap xitayche oqutilidighan qosh til yeslilirige apirip bérishke mejbur qilmaqta iken.