Amérika xitayning sichüenning aba nahiyisidiki tibet namayishchilirigha küch ishletkenlikini tenqid qildi

Amérika dölet ishlar ministirliqi bayanatchisi mark tonér peyshenbe künki bayanatida, xitay bixeterlik küchlirining abadiki kirti ibadetxanisining ishlirigha arilishishi “Xelq'ara jem'iyet teripidin birdek étirap qilin'ghan diniy erkinlik we kishilik hoquq prinsipigha zit” dep tekitligen.

Xelq'ara tibet herikiti teshkilatining bayan qilishiche, ötken ay kirti ibadetxanisidiki bir tibetlik rahib özige ot qoyup bérip ölgendin kéyin, xitay bixeterlik küchliri mezkur ibadetxanidiki rahiblarni tarqaqlashturmaqchi bolup, ibadetxanigha kirmekchi bolghan. Lékin bu ibadetxanidiki rahib we yerlik tibet ahalisining qarshiliqigha uchrap, xitay bixeterlik küchliri bilen yerlik tibet xelqi arisida toqunush yüz bergen.

Xelq'ara tibet herikiti teshkilati toqunushta nurghun tibet puqralirining “Éghir yarilan'ghanliqi” ni bildürgen idi. Mark tonérning eskertishiche, amérika hökümiti bu mesilini xitay emeldarlirining aldigha qoyghan bolup, u amérikining “Weziyetni yéqindin teqib qiliwatqanliqi we elwette bu weqedin endishe qilghanliqi” ni bildürgen.

Xelq'ara tibet herikiti teshkilatining ilgiri sürüshiche, xitay amanliq küchliri kirti ibadetxanisidiki 2000 dek rahibning ichidiki bir qisim kishilerni ibadetxanidin chiqarmaqchi bolghan. Buningdin narazi bolghan yerlik tibet ahalisi rahiblarni qoghdap, xitay amanliq küchliri bilen toqunushqan.