Xitay da'irilirining sudan prézidénti ömer el beshirini ziyaretke teklip qilghanliqi eyibleshke uchridi

Sunda prézidénti ömer el beshir sudanning darfur rayonida irqiy qirghinchiliq qilish jinayiti bilen eyibligen we xelq'ara sot teripidin tutush buyruqi chiqirilghan dölet rehberlirining biri idi.

Darfurdiki qirghinchiliqta xitay teminligen qirghuchi ayropilanlar, tik'ucharlar we qoral-yaraqlarning ishlitilgenliki ilgiri sürülgen.

Xitay tashqi ishlar ministirliqi peyshenbe küni bayanat bérip, sudan prézidénti beshirning 27-iyundin 30-iyun'ghiche xitayda ziyarette bolidighanliqi we xitay re'isi xu jintaw bilen körüshidighanliqini bildürgen idi.

Fransiye agéntliqida neqil qilishiche, bu heqte toxtalghan amérika dölet mejlisi ezasi frank wolf: darfurdiki qirghinchiliqini eng küchlük qollighuchi xitay hökümitige nisbeten nurghun kishilerde endishe peyda bolmaqta, dédi.

U yene mundaq dédi: hazir ular beshirini qarshi almaqchi. Bizge yene qandaq ispat kérek idi?

Xewerde neqil qilishiche yene, kishilik hoquqni közitish teshkilatidiki edliye meslihetchisi balkés jarrah eger xitay el beshirini kutiwalsa, xelq'ara sehnide tolimu shermende yol bilen dang chiqarghan bolidu, dégen.

Ela beshir üstidin tutush buyruqi chiqirilghandin kéyin, u xelq'ara sotning hökümitini étirap qilidighan nurghun döletlerge baralmaydighan bolup qaldi.

Malayshiya bu yil xelq'ara sotning hökümini étirap qilidighanliqini jakarlighandin kéyin, ötken hepte beshir malayshiyagha qaritilghan sepirini bikar qilghan idi.