Америка хитайни тибәт сияситини көздин кәчүрүшкә чақирди

Америка һөкүмити баянат елан қилған пәйшәнбә күни далай ламаниң икки вәкили хитай һөкүмити билән сөһбәт елип бериш үчүн бейҗиңға йетип барған иди. Америка ташқи ишлар министирликиниң баянатчиси гордон догайт мундақ дәйду: " америка хитайниң тибәт мәдәнийити, диний вә күндилик турмушиға тәсир көрситип, вәзийәтниң җиддийлишип кетишигә сәвәб болған тибәт сияситини көздин кәчүрүшкә чақириду".

Гордон дугайт йәнә хитайниң мухбирлар, дипломатлар вә хәлқара көзәткүчиләрниң тибәткә киришигә йол қоюшини тәләп қилип, америкиниң тибәт - хитай мәсилисидики мәйданини тәкитлиди вә далай ламаниң хитай - тибәт сөһбитиниң нәтиҗисидин үмидсизләнгәнлики һәққидики баянатиға инкас қайтурди. У " тибәт мәсилисидики қийинчилиқларни мувапиқ, үнүмдар бир тәрәп қилишниң йоли хитай һөкүмитиниң далай лама вәкиллири билән җидди вә әмили сөһбәт елип бериштур. Бу бизниң узундин бери чиң туруп кәлгән вә изчил тәкитләп келиватқан қаришимиз " дәйду.

Далай лама өткән шәнбә күни хитай хәлқиғә ишинидиғанлиқи, лекин хитай һөкүмитигә болған ишәнчисиниң тәврәп қеливатқанлиқини билдүргән иди.

Хитай компартийиси мәркизи бирликсәп бөлүминиң мәсуллири җүмә күни лоди гяри башчилиқидики далай лама вәкилләр өмики билән бейҗиңда сөһбәт башлиған. Роейтерс агентлиқиниң хәвәр қилишичә, бейҗиңдики сөһбәттин хәвәрдар әрбаблар далай лама вәкиллириниң "нопуси тибәт болмиған етник аз санлиқлар райони" ға зиярәткә орунлаштурулидиғанлиқини билдүргән, лекин бу районниң исми вә зиярәткә орунлаштурулушниң сәвәбини чүшәндүрмигән.

Америка ташқи ишлар министирлики баянатчиси дугайт, америка вә дунядики башқа дөләтләр сөһбәтниң конкерт илгириләшкә еришишигә үзлүксиз диққәт қилидиғанлиқини билдүрди.