Amérika xitayni tibet siyasitini közdin kechürüshke chaqirdi

Amérika tashqi ishlar ministirliki xitay emeldarliri bilen tibet rohaniy dahiysi dalay lamaning wekilliri jüme küni béyjingda söhbet bashlashtin burun bayanat élan qilip, xitay hökümitidin tibet siyasitini közdin kechürüshni, hazirqi siyasetning tibet weziyitini jiddiyleshtürüwetkenlikini bildürdi.
Muxbirimiz erkin
2008-10-31
Share

Amérika hökümiti bayanat élan qilghan peyshenbe küni dalay lamaning ikki wekili xitay hökümiti bilen söhbet élip bérish üchün béyjinggha yétip barghan idi. Amérika tashqi ishlar ministirlikining bayanatchisi gordon dogayt mundaq deydu: " amérika xitayning tibet medeniyiti, diniy we kündilik turmushigha tesir körsitip, weziyetning jiddiyliship kétishige seweb bolghan tibet siyasitini közdin kechürüshke chaqiridu".

Gordon dugayt yene xitayning muxbirlar, diplomatlar we xelq'ara közetküchilerning tibetke kirishige yol qoyushini telep qilip, amérikining tibet - xitay mesilisidiki meydanini tekitlidi we dalay lamaning xitay - tibet söhbitining netijisidin ümidsizlen'genliki heqqidiki bayanatigha inkas qayturdi. U " tibet mesilisidiki qiyinchiliqlarni muwapiq, ünümdar bir terep qilishning yoli xitay hökümitining dalay lama wekilliri bilen jiddi we emili söhbet élip bérishtur. Bu bizning uzundin béri ching turup kelgen we izchil tekitlep kéliwatqan qarishimiz " deydu.

Dalay lama ötken shenbe küni xitay xelqighe ishinidighanliqi, lékin xitay hökümitige bolghan ishenchisining tewrep qéliwatqanliqini bildürgen idi.

Xitay kompartiyisi merkizi birliksep bölümining mes'ulliri jüme küni lodi gyari bashchiliqidiki dalay lama wekiller ömiki bilen béyjingda söhbet bashlighan. Roéytérs agéntliqining xewer qilishiche, béyjingdiki söhbettin xewerdar erbablar dalay lama wekillirining "nopusi tibet bolmighan étnik az sanliqlar rayoni" gha ziyaretke orunlashturulidighanliqini bildürgen, lékin bu rayonning ismi we ziyaretke orunlashturulushning sewebini chüshendürmigen.

Amérika tashqi ishlar ministirliki bayanatchisi dugayt, amérika we dunyadiki bashqa döletler söhbetning konkért ilgirileshke érishishige üzlüksiz diqqet qilidighanliqini bildürdi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet