Үрүмчидә русийә вә оттура асия дөләтлиридә хитай тили оқутуш мәсилиси бойичә муһакимә йиғини ечилди

Хитайниң саһибханилиқи билән үрүмчидики шинҗаң университети өткән һәптә русийә вә оттура асия мутәхәссислирини топлап, хитай тилини русийә вә оттура асияда оқутуш мәсилилири бойичә бир илмий муһакимә йиғини ачти.
Мухбиримиз үмидвар
2011.07.10

Хитай, русийә, қазақистан, қирғизистан, таҗикистан қатарлиқ шаңхәй һәмкарлиқ тәшкилатиға әза дөләтләрниң 50 тин артуқ маарип саһәсигә мәсул хадимлири, маарипшунаслири вә хитай тили оқутуш мутәхәссислири қатнашқан мәзкур йиғинда бу дөләтләрдики хитай тили оқутуш күчи, маарип түзүлмиси, оқутуш материяллири вә оқутуш методикиси қатарлиқ түрлүк мәсилиләр муһакимә қилинған.

Шинҗаң гезитиниң бу һәқтики учуридин мәлум болушичә, йиғинниң асаслиқ мәқсити уйғур елиниң оттура асия вә русийә қатарлиқ әтраптики мәмликәтләр билән болған хитай тили оқуш саһәсидики һәмкарлиқлирини күчәйтип, мәзкур районлардики хитай тили оқутушни кеңәйтиштин ибарәт.

Тәһлилчиләр хитай тилини өгинишни хитай билән қошна әлләрдә қанат яйдуруш хитайниң мәдәнийәт истратегийисила әмәс, бәлки сиясий истратегийиси биләнму зич мунасивәтлик нишан икәнликини билдүрмәктә.

Мәлум болушичә, һазирғичә хитай бир қисим қошна оттура асия дөләтлиридә “коңзи институти” дәп аталған мәхсус хитай тили вә мәдәнийитини оқутидиған институтларни арқиму-арқидин қурған болуп, шинҗаң университети, или педагогика институти қатарлиқ алий мәктәпләр қазақистан қатарлиқ оттура асия дөләтлириниң бәзи университетлири билән келишим түзүп, бу дөләтләрдики хитай тили оқутушни маддий вә оқутқучилар күчи җәһәттин тәминлимәктә икән.

Шинҗаң университети 1985-йилидин таки һазирғичә 40 дөләт тин кәлгән 4000 дин артуқ оқуғучини қобул қилған болуп, игилинишичә, буларниң зор көпчилики уйғур ели билә қошна дөләтләрдин кәлгәнләр икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.