Xitay türme da'iriliri alimjan hémitning adwokati bilen körüshüshini ret qildi

Uning adwokati yéqinda ürümchige kélip ötken hepte alimjan hémit bilen körüshüshni telep qilghan bolsimu, biraq türme da'iriliri alimjanning mesilisi “Dölet mexpiyetliki”ge yatidighanliqini ilgiri sürüp, uning nöwette aptonom rayonluq 3‏-türmide yétiwatqan alimjan hémit bilen körüshüshini ret qilghan.

Amérikining téksas shtatidiki xitayda xristi'an misyonérliq pa'aliyiti bilen shughullinidighan “Junggo yardem jem'iyiti” namliq teshkilatning bildürüshiche, alimjanning adwokati 12‏-awghust aptonom rayonluq türme bashqurush idarisining mes'ulliri bilen körüshüp, alimjan bilen körüshüshni telep qilghan.

Türme bashqurush idarisidiki da'iriler, adwokatning 3‏-türme bilen alaqilishishni we alimjanning maqulluqini élish kéreklikini bildürgen. Shuning bilen adwokat 3‏-türmige bérip, türmining wang famililik bir mes'uli bilen körüshken. Gerche wang famililik türme mes'uli adwokatni alimjan bilen körüshtürüshke maqul bolghan bolsimu, biraq körüshüshke resmiyet öteydighan waqitta “Bu déloning dölet mexpiyetliki”ge kiridighanliqini bildürüp, “Alimjanni adwokat bilen körüshtürüshke bolmaydu” dégen. “Junggo yardem jem'iyiti” ning mes'uli pop bö shichyu xitay edliye da'irilirini tenqidlep, uning adwokat bilen körüshüshige yol qoymasliq, da'iriler sadir qilghan qanun-tüzümge xilap qilmish, dep körsetken.

Alimjan hémit 2009‏-yili “Chet'elliklerge junggoning mexpiyetlikini ashkarilash” bilen eyiblinip, 15 yilliq qamaq jazasigha höküm qilin'ghan.