Uyghur ishchilar bilen xitaylar arisidiki toqunushqa sewebchi bolghan bir xitay qolgha élindi

Xitay da'iriliri gu'angdung ölkiside yüz bergen Uyghur ishchilar bilen xitaylar arisidiki toqunushqa sewebchi bolghan bir xitay ishchini qolgha alghan bolup, xewerlerge qarighanda, mezkur xitay ishchi Uyghur ishchilarning xitay qizlargha basqunchiliq qilghanliqi heqqide ösek söz tarqatqan iken.
Muxbirimiz jüme
2009.06.29

Melum bolushiche, ju famililik bu xitay toqunush yüz bergen zawutning sabiq ishchisi bolup, u bu yil 16 - iyun xitayche tor betlerde Uyghur élidin kelgen 6 oghulning ikki neper xitay qizgha basqunchiliq qilghanliqi heqqide xewer tarqatqan we mezkur xewer bashqa tor betlirige chaplighan.

Fransiye agéntliqining neqil élip körsitishiche, xitay saqchiliri weqening kélip chiqishigha sewebchi bolghan ju famililik xitayni torda "ösek söz we xata uchur" tarqatqan dégen jinayet bilen eyiblep qolgha alghan.

Gu'angdung ölkisi shawgu'en shehiridiki bir oyunchuq zawutida Uyghur ishchilar bilen xitaylar arisida yüz bergen qanliq toqunush 26 - iyun peyshenbe küni seher sa'et 2 de yüz bergen bolup, toqushta 120 etrapida adem yarilan'ghanliqi, bir nechche Uyghurning öltürülgenliki ilgiri sürülmekte.

Toqunushta yarilan'ghanlar we ölgenler heqqide her xil sanliq melumatlar mewjut. Boshün xewerler tori qatarliq axbarat wasitilirining xewer qilishiche, ölgüchilerning sani jem'iy 18 neper bolup, bularning 12 nepiri Uyghur, 6 nepiri xitay.

Xewerlerge qarighanda, shawgu'endiki oyunchuq zawutida 800 neper Uyghur ishlewatqan bolup, bularning hemmisi qeshqer wilayiti konasheher nahiyisidin bu yil may we iyunda bu zawutqa élip kélin'gen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.