Хитай ғәрб истилидики димукратийә вә қанун сестимисиға көчүшни йәнә рәт қилди

Хитай мәркизи телевизийә истансиси җүмә күнки хәвиридә хитай хәлқ сияси мәслиһәт кеңишиниң рәиси, компартийә мәркизи комитет сияси бюросиниң даимий әзаси җя чиңлинниң " биз пүтүн мәдәнийәтләрниң бәзи илғар тәрәплирини қобул қилишимиз," дегәнлики, лекин униң йәнә " биз ғәрб демукратийиси вә қанун сестимисини үлгә қилмаймиз," дәп тәкитлигәнликини билдүрди.

Хәвәрдә қанун ислаһатиниң конкирит мәзмуниға даир тәпсилатлар тилға алмиған. Хитай әдлийә даирилири буниңдин 2 йил бурун өлүм җазасини тәдбиқлаш һоқуқини өлкә дәриҗилик сот мәһкимилириниң илкидин али сотниң илкигә өткүзүвалғанлиқини елан қилған. Лекин чәтәлдики уйғур тәшкилатлири буниң уйғур сияси мәһбуслириға өлүм җазаси беришни азайтишта роли болмиғанлиқини билдүрмәктә иди.

Анализчилар хитай әдлийә сестимисидики мәсилиниң қурулма мәсилиси икәнлики, хитайда компартийиниң әдлийә органлириға болған манаполлиқиға хатимә берилип, әдлийә мустәқиллиқи ишқа ашурулмиғичә мәсилә һәл болмайдиғанлиқини билдүрмәктә.

Уйғур қанун сепидики исмини ашкарилашни халимайдиған мутәхәссисләр уйғур елидә әдлийә контроллиқиниң еғирлиқи, уйғур аптоном райони парткоми ваң лечүәнниң бир қетим "ш у а р " юқири сот мәһкимисини зиярәт қилип, "сиясини тутқа қилған сотчилар яхши сотчилар, сиясини тутқа қилмиған сотчилар начар сотчилар" дегәнлики буниң типик мисали икәнликини билдүрмәктә.