Xitayning déngiz mehsulatlirighimu mélamin arilashturulghan bolushi mumkin

Xitayda ishlepchiqirilghan süt parashokigha arilashturulghan mélamin maddisi pütün dunyada yüz minglighan bowaqning késel bolushini keltürüp chiqirip, nurghunlighan döletlerning xitaydin süt parashoki import qilishni cheklishige hemde xitay süt ishlepchiqirish sana'itining éghir krizisqa düch kélishige seweb bolghan idi.

Emdi nurghunlighan alim we tetqiqatchilar xitay déngiz mehsulatlirighimu zeherlik ximiyiwi madda mélamin arilashturulghan bolushi mumkinlikini otturigha qoymaqta.

Xitay dunyadiki eng köp déngiz mehsulatliri ishlepchiqiridighan dölet bolup, her yili nechche on milyard dollarliq déngiz mehsulati éksport qilidu.

Amérikida chiqidighan los anjilis waqti gézitining xewer qilishiche, amérika 2007‏ - yilining özidila xitaydin 2 milyard dollarliq déngiz mehsulati import qilghan. Yémek sana'iti metexessisliri we sodigerlerning bayan qilishiche, xitayning béliq qatarliq déngiz mehsulatliri ishlepchiqirish orunliri béliq we bashqa déngiz mehsulatlirigha bérilidighan yemlerge dawamliq mélamin maddisi qoshiwétidiken.

Mulahizichilar, xitay déngiz mehsulatlirida mélamin maddisining barliqi heqqidiki gumanlarning otturigha chiqishi, zeherlik süt parashoki sewebidin krizisqa duch kelgen xitay yémeklik sana'itini téximu qéyin ehwalgha chüshürüp qoyushi mumkin déyishmekte.