Хитайда қолға елинған қудрәтлик илаһниң христианлири тәшкилатиниң әзаси 1300 гә йәтти

Бүгүн 21-декабир мая календариниң ахирлашқан күни шундақла хәлқ арисида тарқалған “қиямәт қайим” ривайитидики “2012-йили 21-декабир заман ахири башлиниду” дейилгән күн.
Мухбиримиз меһрибан
2012.12.21

Хәлқара мәтбуатларда бу күнгә қарита һәрқайси дөләтләрдики пуқраларниң охшимиған инкаслири вә әнглийә қатарлиқ җайларда “қишлиқ күн-түн тохташ күни” хатириләнгәнлики хәвәр қилинди. Һалбуки, диний қараш вә диний паалийәтләр әң қаттиқ чәклиниватқан хитайда пуқралар арисидики “қиямәт қайим вәһимиси” хитай һөкүмәт даирилирини әнсизликкә салған.

Мушу бир һәптә ичидә хитайда “заман ахири вәһимиси” тарқитип, җәмийәттә қалаймиқанчилиқ чиқарған дегән баһанидә қудрәтлик илаһниң христианлири намидики тәшкилат әзалиридин 1300 киши қолға елинған болуп, хитайдики аммиви тор бекәтлиридә мушу бир ай ичидә хитай пуқралири арисида заман ахири вәһимиси әвҗ алғанлиқи, “заман ахири вәһимиси” тарқатти дегән баһанидә тутқун қилинғанлар саниниң нәччә миңға йәткәнлики илгири сүрүлди.

Мәлум болушичә, улар тарқатқан тәшвиқ вәрәқилиридә коммунизмға қарши туруш, парихор әмәлдарларға қарши турушқа охшаш чақириқларниму оттуриға қойған. Бу әһвал хитай һөкүмитини әнсирәткән болуп, өткән һәптидин башлап хитай даирилири бу тәриқәт әзалирини “питнә-пасат тарқитип, җәмийәт аманлиқини бузди, ахирқи заман сәпсәтиси билән кишиләрни алдам халтисиға чүшүрүшкә урунди” дәп әйибләп, қолға елишқа башлиған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.