Хитай, уйғур ели қатарлиқ җайларда христиан черкавлириниң рожҗистива йиғилишини чәклигән

Америкиниң тексас штатидики җуңго ярдәм җәмийитиниң җүмә күни елан қилишичә, уйғур елиниң читәй наһийисидә христианлар 25 - декабир рожҗистива күни бир аилә черкавиға йиғилип, диний мурасим өткүзиватқанда мәзкур аилә черкавиниң 7 нәпәр дин тарқатқучиси йәрлик сақчилар тәрипидин тутуп кетилгән.

Даириләр йәнә 21 ‏ - декабир күни ғулҗа шәһиридики бир аилә христиан черкавиниң паалийитини чәкләп, аилә черкавиниң чоқундурғучисиға әгәр паалийитини давамлаштурса қолға елинидиғанлиқи тоғрисида агаһландуруш бәргән.

Җуңго ярдәм җәмийити бу түрдики вәқәләрниң уйғур или билән чәкләнмәйдиғанлиқини, аилә черкавлириниң рожҗистива паалийитини чәкләш вәқәлириниң әнхуй, хебей, хенән өлкилиридиму йүз бәргәнлики, 25 ‏ - декабир күни әнхуйниң хавҗу шәһиридики бир аилә черкави рожҗистива байримини тәбрикләш мурасими өткүзиватқанда сақчиларниң һуҗумиға учрап, черкавниң 2 мөтивериниң тутуп кетилгәнликини билдүргән.

24 ‏ - Декабир күни йәни рожҗистива байриминиң һарпа күни сақчилар хенәнниң йүйчиң наһийисидә аилә черкавиниң 9 нәпәр мөтиверини қолға алған болуп, уларниң 5 нәпирини җәриманә төлигәндин кейин қоюп бәргән. Хитай һөкүмити тизимға алдурмиған һәр қандақ диний паалийәт вә диний гуруһларни " қанунсиз" диний паалийәт яки диний гуруһ," дәп қаримақта вә уларниң һәрикитини чәклимәктә.