Xitay, Uyghur éli qatarliq jaylarda xristi'an chérkawlirining rozhjistiwa yighilishini chekligen

Amérikining téksas shtatidiki junggo yardem jem'iyitining jüme küni élan qilishiche, Uyghur élining chitey nahiyiside xristi'anlar 25 - dékabir rozhjistiwa küni bir a'ile chérkawigha yighilip, diniy murasim ötküziwatqanda mezkur a'ile chérkawining 7 neper din tarqatquchisi yerlik saqchilar teripidin tutup kétilgen.

Da'iriler yene 21 ‏ - dékabir küni ghulja shehiridiki bir a'ile xristi'an chérkawining pa'aliyitini cheklep, a'ile chérkawining choqundurghuchisigha eger pa'aliyitini dawamlashtursa qolgha élinidighanliqi toghrisida agahlandurush bergen.

Junggo yardem jem'iyiti bu türdiki weqelerning Uyghur ili bilen cheklenmeydighanliqini, a'ile chérkawlirining rozhjistiwa pa'aliyitini cheklesh weqelirining enxuy, xébéy, xénen ölkiliridimu yüz bergenliki, 25 ‏ - dékabir küni enxuyning xawju shehiridiki bir a'ile chérkawi rozhjistiwa bayrimini tebriklesh murasimi ötküziwatqanda saqchilarning hujumigha uchrap, chérkawning 2 mötiwérining tutup kétilgenlikini bildürgen.

24 ‏ - Dékabir küni yeni rozhjistiwa bayrimining harpa küni saqchilar xénenning yüyching nahiyiside a'ile chérkawining 9 neper mötiwérini qolgha alghan bolup, ularning 5 nepirini jerimane töligendin kéyin qoyup bergen. Xitay hökümiti tizimgha aldurmighan her qandaq diniy pa'aliyet we diniy guruhlarni " qanunsiz" diniy pa'aliyet yaki diniy guruh," dep qarimaqta we ularning herikitini cheklimekte.