Хитай йәнә бир қетим мухбирларни әң көп тутқун қилған дөләт болуп баһаланди

Мәркизи ню - йорктики мухбирларни қоғдаш комитети доклат елан қилип, бу йил хитайни йәнә бир қетим йәр шаридики мухбирларни әң көп тутқун қилған дөләт, дәп баһалиди. Буниң билән хитай йеқинқи 11 йилдин бери һәр йили уда мухбирларни әң көп тутқун қилған дөләтлик орнини сақлап қалған.
Мухбиримиз әркин
2009-12-11
Share

Хитайдин қалса, иран, куба, еритрийә вә берма мухбирларни әң көп тутқун қилған дөләтләр һесаблинидикән. Доклатта әскәртишичә, хитайда қолға елинған яки тутқун қилинған мухбирларниң көп қисми интернетта мақалә язидиған әркин язғучилар икән. Мәлум болушичә, өткән йили хитайда тутқунға учриған мухбирларниң сани бир қәдәр азлиған болсиму, лекин бу йәнила хитайниң дунядики мухбирларни әң көп түрмигә солайдиған дөләтлик орнини өзгәртәлмигән.

 Доклатта, хитай даирилириниң нөвәттә 24 мухбирни түрмидә тутуп туруватқанлиқи, буларниң 22 нәпириниң әркин язғучи икәнлики, түрмидикиләрниң ичидә қәшқәрлик уйғур журналистлардин абдуғени мәмтимин вә тибәтлик һөҗҗәтлик филим режиссори дундоп ваңченниң барлиқи тәкитләнгән.

Абдуғени мәмтимин, қәшқәрдики бир мәктәпниң оқутқучиси, тәрҗиман вә әркин журналист болуп, у 2003 - йили қәшқәр вилайәтлик оттура сода мәһкимиси тәрипидин "дөләт мәхпийәтлики"ни ашкарилаш җинайити билән әйиблинип 9 йиллиқ қамақ җазасиға һөкүм қилинған иди.

Тибәтлик һөҗҗәтлик филим режиссори дундуп ваңчен болса 2008 ‏- йили тибәтләрниң турмушини тема қилған "қорқунчни йеңиш" намлиқ 25 минутлуқ һөҗҗәтлик филим ишләп, чәтәлдики тибәтләргә йоллап бәргәнлики сәвәбидин қолға елинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт