Сичүәнниң шифаң шәһиридики наразилиқ һәрикитидә тутқун қилинған 21 киши қоюп берилгән

Сичүәнниң шифаң шәһиридә мис кан қурулушиға қарши елип берилған наразилиқ һәрикитидә тутқун қилинған намайишчиларниң мутләқ көп қисми қоюп берилгән.
Мухбиримиз әркин
2012-07-04
Елхәт
Пикир
Share
Принт

Йеқинқи 3 күндин буян шифаң шәһиридә кәң көләмлик намайиш йүз берип, пуқралар һөкүмәтниң мис кан қурулушиға қарши чиққан. Ғәзәпләнгән намайишчилар шәһәрлик һөкүмәт бинасиниң дәрваза вә деризилирини чеқип ташлиған. Сақчи вә һөкүмәт хадимлирини таш боранға тутқан.

Даириләр мис кан қурулушиниң тохтитилғанлиқини елан қилған болсиму, бирақ өйму-өй ахтуруш елип берип, намайиш йетәкчилиридин 27 кишини тутқун қилған иди. Даириләр сәйшәнбә күни кәч саәт 11:00 ләрдә 21 кишиниң тәрбийә берилип қоюп берилгәнликини елан қилди.

Көзәткүчиләрниң илгири сүрүшичә, хитай даирилириниң бесимға тиз пүкүп мис кан қурулушини тохтитиши вә тутқунларни қоюп бериши, пуқралар қаттиқ контрол астидики мәзкур әлдә бинормал әһвал болсиму, бирақ бу вәқә пуқралириниң муһит булғинишқа наразилиқи күчлүк икәнликини, хитай һөкүмитиниң омумий йүзлүк наразилиқ һәрикити партлаштин әнсирәйдиғанлиқини ипадиләйдикән.

Чаршәнбә күни бирәр йүздәк адәм шифаң шәһәрлик партком алдида давамлиқ намайиш қилип, һазирму давамлиқ тутуш турулуватқан 6 кишини қоюп беришни тәләп қилған.

Ройтерс ахбарат агентлиқиниң хәвәр қилишичә, йәрлик пуқралар һөкүмәтниң мис кан қурулушини тохтитиш вәдисидә туруш -турмаслиқиға қарайдиғанлиқи, әгәр һөкүмәт вәдисидә турмиса техиму зор көләмлик намайиш қилидиғанлиқини билдүргән.

Пикирләр (0)
Share
Толуқ бәт