Уйғур ели 5 хизмәт гурупписини сәргәрдан балиларниң әһвалини игиләшкә әвәтти

Шинхуаниң хәвәр қилишичә, уйғур аптоном райони 5 хизмәт гурупписини ичкири алдап елип кетилгән балилар бир қәдәр көп област вә вилайәтләргә әвәтип сәргәрдан балиларниң сани, әһвали һәм башқа учурлирини игиләп, балиларни алдап ичкиригә елип барғучи җинайи гуруппиларға омумйүзлүк зәрбә бериш тәйярлиқини пүттүргән.

Бу һәрикәткә хитай мәркизий һөкүмитиму алаһидә көңүл бөлгән болуп, 4-айниң ахирлирида хитай җамаәт хәвпсизлик министирлиқи вә аптоном районлуқ партком айрим-айрим йиғин чақирип, орунлаштуруш елип барған һәмдә уйғур аптоном районлуқ җамаәт хәвпсизлик назарити мәхсус балиларға мунасивәтлик җинайәтчиләргә зәрбә беришкә рәһбәрлик қилиш гурупписи қурған.

26-Апрел күни пүтүн хитай бойичә өсмүр балиларни алдап ичкиригә елип келидиған җинайәтчиләргә зәрбә бериш хизмәт йиғини нәнчаң шәһиридә ечилған болуп, буниңға хитай җамаәт хәвпсизлик министирлиқиниң муавин министири биваситә қатнишип, җинайи гуруппиларға қаттиқ зәрбә беришни тәләп қилған.

Нөвәттә, бу һәрикәтниң пүтүн хитай бойичә бирликтә елип берилидиғанлиқи җәзимләштүрүлмәктә.

Ичкиригә алдап кетилгән уйғур балилири мәсилиси узундин буян уйғур ели миқясида зор ғулғулиларни қозғап келиватқан мәсилә болуп, бу балилар ичкири өлкиләрдики пуқралар тәрипидин “шинҗаңлиқ янчуқчилар”, “оғрилар” дәп қарилип, җисманий вә мәниви зәрбиләргә учраш һәм һақарәтләшләргә дуч кәлмәктә иди.