Uyghur éli 5 xizmet guruppisini sergerdan balilarning ehwalini igileshke ewetti

Shinxu'aning xewer qilishiche, Uyghur aptonom rayoni 5 xizmet guruppisini ichkiri aldap élip kétilgen balilar bir qeder köp oblast we wilayetlerge ewetip sergerdan balilarning sani, ehwali hem bashqa uchurlirini igilep, balilarni aldap ichkirige élip barghuchi jinayi guruppilargha omumyüzlük zerbe bérish teyyarliqini püttürgen.

Bu heriketke xitay merkiziy hökümitimu alahide köngül bölgen bolup, 4-ayning axirlirida xitay jama'et xewpsizlik ministirliqi we aptonom rayonluq partkom ayrim-ayrim yighin chaqirip, orunlashturush élip barghan hemde Uyghur aptonom rayonluq jama'et xewpsizlik nazariti mexsus balilargha munasiwetlik jinayetchilerge zerbe bérishke rehberlik qilish guruppisi qurghan.

26-Aprél küni pütün xitay boyiche ösmür balilarni aldap ichkirige élip kélidighan jinayetchilerge zerbe bérish xizmet yighini nenchang shehiride échilghan bolup, buninggha xitay jama'et xewpsizlik ministirliqining mu'awin ministiri biwasite qatniship, jinayi guruppilargha qattiq zerbe bérishni telep qilghan.

Nöwette, bu heriketning pütün xitay boyiche birlikte élip bérilidighanliqi jezimleshtürülmekte.

Ichkirige aldap kétilgen Uyghur baliliri mesilisi uzundin buyan Uyghur éli miqyasida zor ghulghulilarni qozghap kéliwatqan mesile bolup, bu balilar ichkiri ölkilerdiki puqralar teripidin “Shinjangliq yanchuqchilar”, “Oghrilar” dep qarilip, jismaniy we meniwi zerbilerge uchrash hem haqaretleshlerge duch kelmekte idi.