ئامېرىكا ئۇيغۇر ئۇيۇشمىسى ئايروپىلان بۇلاش جىنايىتى ئارتىلىپ ئۆلۈم جازاسىغا ھۆكۈم قىلىنغان 3 ئۇيغۇر ئۈچۈن نارازىلىق باياناتى ئېلان قىلدى

باياناتتا يەنە خىتاينىڭ «يەر شارى ۋاقتى» گېزىتىنىڭ ماقالە ئېلان قىلىپ، رابىيە قادىر خانىم ۋە ئۇيغۇر دېموكراتىك ھەرىكىتىنى قارىلىغانلىقىنى تەنقىد قىلىندى.

دۇنيا ئۇيغۇر قۇرۇلتىيى رەئىسى رابىيە قادىر خانىم بۈگۈن ئەركىن ئاسىيا رادىئوسىنىڭ زىيارىتىنى قوبۇل قىلىپ، خىتاي ھۆكۈمىتىنىڭ ئۇيغۇرلارغا قاراتقان دۆلەت دەرىجىلىك تېررورلۇق باستۇرۇش سىياسىتى ئۆز ئەركىنلىكىنى تەلەپ قىلىۋاتقان ئۇيغۇرلارنىڭ قارشىلىق ھەرىكەتلىرىگە سەۋەب بولۇۋاتقان ئاساسى ئامىل ئىكەنلىكىنى تەكىتلەپ، دۇنيا جامائەتچىلىكىنى شەرقىي تۈركىستاندىكى ئۇيغۇرلار باستۇرۇلۇۋاتقان ۋەزىيەتكە دىققەت قىلىشقا چاقىردى.

خىتاي ھۆكۈمەت ئاخباراتلىرىدا تۈنۈگۈن، 11-دېكابىر كۈنى بۇ يىل 29-ئىيۇن كۈنى خوتەندە ئايروپىلان بۇلاش ۋەقەسىنى كەلتۈرۈپ چىقارغان دەپ ئەيىبلىنىپ قولغا ئېلىنغان ئۇيغۇرلارنىڭ 3 نەپىرىگە ئۆلۈم جازاسى بېرىلگەنلىكىنى خەۋەر قىلغاندىن كېيىن، دۇنيا ئۇيغۇر قۇرۇلتىيى باياناتچىسى دىلشات رىشىت غەرب ئاخبارات ۋاسىتىلىرىدە بايانات ئېلان قىلىپ، خىتاي دائىرىلىرىنىڭ بۇ ئۈچ نەپەر ئۇيغۇرغا ئۆلۈم جازاسىدىن ئىبارەت ئېغىر جازا بېرىشى خىتاينىڭ سىياسىي مەقسىتىنى ئىپادىلەيدىغانلىقىنى بىلدۈرۈپ، ئۇيغۇرلارنىڭ خىتايدا ئەڭ قاتتىق باستۇرۇلۇشقا ئۇچراۋاتقانلىقىنى تەكىتلىگەن ئىدى.