Xitay hökümiti xotende bir Uyghur torxana igisini mexpiy sotlap, muddetsiz qamaq jazasigha höküm qildi

Dunya Uyghur qurultiyining ashkarilishiche, muhemmet niyaz xoten ayrodromining udulidiki bir Uyghur torxanisining igisi bolup, u 2007‏-yili 6‏-ayda qolgha élin'ghan.

Qurultay bayanatchisi dilshat rishit , muhemmet niyazning 18-iyul xoten “Nawagh weqesi” din bir kün burun sotlan'ghanliqi, uning da'iriler teripidin torxanidiki kompyutorlargha mexpiy yumshaq détal orunlashturup, qanunsiz meshghulat élip bérish, döletni parchilaydighan teshwiqat buyumlirini saqlash bilen eyiblinip qolgha élin'ghanliqini we muddetsiz qamaqqa höküm qilin'ghanliqini bildürdi.

Dilshat rishitning ilgiri sürüshiche, eyni chaghda muhemmet niyaz bilen teng yene 3 adem qolgha élin'ghan. Lékin muhemmet niyazgha qolgha élin'ghan töteylenning ichide eng éghir jaza bérilgen. Biraq dilshat rishit, muhemmet niyaz bilen teng qolgha élin'ghan alghan 3 kishining ismini tilgha almidi.

Sot mexpiy ötküzülgenliktin muhemmet niyazning adwokat teklip qilalighan-qilalmighanliqi, uninggha özini aqlash hoquqi bérilgen -bérilmigenliki melum emes. Shundaqla yene xitay da'irilirining muhemmet niyazni 4 yil tutup turghandin kéyin andin sotlashtiki meqsitimu éniq emes.

Xelq'ara jem'iyet we kishilik hoquq teshkilatliri xitay hökümitini siyasiy öktichi we Uyghur pa'aliyetchilirini xalighanche tutqun qilish, ularning adwokat teklip qilish, adil sotlinish hoquqini ret qilish bilen eyiblep kelgen idi.