خىتاينىڭ خۇاۋېي، جوڭشىڭ شىركەتلىرى خىتاي ھۆكۈمىتىگە ئىشپىيونلۇق قىلىدىغانلىقىنى رەت قىلدى

بۇ ئىككى شىركەتنىڭ دىكتورلىرى ئىستىخبارات كومىتېتى ئەزالىرىنىڭ ئالدىدا قولىنى كۆتۈرۈپ قەسەم قىلىپ، ئۆزلىرىنىڭ خىتاي ھۆكۈمىتىگە قاراشلىق بولمىغان مۇستەقىل شىركەت ئىكەنلىكىنى ئىلگىرى سۈرگەن.

خىتاي شىركەت دىكتورلىرىنىڭ ئامېرىكا ئاۋام پالاتا ئەزالىرىغا قەسەم بېرىپ گۇۋاھلىقتىن ئۆتۈشى تۇنجى قېتىملىق ۋەقە. خۇاۋېي شىركىتى خىتاي ئازادلىق ئارمىيىسىنىڭ پېنسىيىگە چىققان بىر ھەربىي ئىنژېنېرى تەرىپىدىن قۇرۇلغان.

جوڭشىڭ گۇرۇھى بولسا بىر قىسمى خىتاي دۆلەت ئىگىلىكىدىكى كارخانا. بۇ ئىككى شىركەت ئۆزلىرىنىڭ تىجارىتىنى ئامېرىكىغا كېڭەيتىشكە ئۇرۇپ كەلگەن. بىراق ئۇلارنىڭ خىتاي دۆلەت ئورگانلىرى بىلەن بولغان مۇناسىۋىتى، سودىنى باھانە قىلىپ، خىتايغا جاسۇسلۇق قىلىش ئېھتىماللىقى ۋە بۇنىڭ ئامېرىكا دۆلەت بىخەتەرلىكىگە پەيدا قىلىدىغان خەۋپى، دۆلەت مەجلىسىنىڭ دىققىتىنى قوزغاپ كەلگەن.

يىغىندا دېموكراتىك ئاۋام پالاتا ئەزاسى داچ رۇپپېرسبېرگېر ئاگاھلاندۇرۇپ: ئەگەر سىلەر ئامېرىكىدا سودا قىلماقچى بولساڭلا، ئۇ ھالدا خىتاي ھۆكۈمىتىگە بىزنىڭ سودا ئورۇنلىرىمىزغا قارىتىلغان تور ھۇجۇمىنى توختىتىشنى ئېيتىپ قويۇشۇڭلار كېرەك، دېگەن. جۇمھۇرىيەتچى ئاۋام پالاتا ئەزاسى مايك روجېرس ھەر ئىككى شىركەتنى تەنقىدلەپ، ئۇلارنىڭ خىتاي بىلەن بولغان مۇناسىۋىتىگە قانائەتلىنەرلىك جاۋاب بەرمىگەنلىكىنى ئىلگىرى سۈرگەن.