Yaponiye ichki kabinéti "Atom yadro radi'atsiyisi tölem qanun layihisi" ni élan qildi

Bügün 14-iyun küni yaponiye dölet ishliri ichki kabinéti yighin échip, yaponiyide bu yil 3-ayda yüz bergen 9 bal éghir yer tewreshtin kéyin yüz bergen yadro éléktr istansisidiki atom radi'atsiye maddilirining éqip kétish weqesi sewebidin ziyankeshlikke uchrighuchilargha muwapiq tölem bérilidighanliqi heqqide qarar layihisi maqullidi.
Muxbirimiz méhriban
2011-06-14
Share

Yaponiye ichki ishlar kabinéti bu qarar heqqide chüshendürüsh bérip, ichki kabinétning bundaq bir qararni élishi , atom radi'atsiyisi ziyinigha uchrighanlargha muwapiq tölem bérish üchün ikenlikini ilgiri sürgen.

Bügün yaponiye metbu'atliri bergen xewerliride yene, yaponiyidiki apet yüz bergen jay fukushima arilida 4 yashtin 15 yashqa qeder bolghan 34 ming neper baligha atom radi'atsiyisini ölchesh eswabi tarqitilip, ularning bedinidiki atom radi'atsiye nurining eks tesiri ölchinidighanliqi xewer qilindi.

Fukushima arilidiki melum bir hökümet emeldarining bildürüshiche, 9-aydin bashlap fukushima shehiridiki balilargha bu xil eswab tarqitilip, ularning bedinidiki atom radi'atsiyisi tesirining derijisi ölchinidiken.

Melum bolushiche, fukushima arilidiki atom éléktr istansisida yüz bergen atom radi'atsiye tarqilish hadisisidin kéyin fukushima arilida texminen 80ming etrapidiki ahale atom radi'atsiye nurining tesirige uchrighanliqi ilgiri sürülmekte iken.

Matériyallardin melum bolushiche, xitay hökümiti 60-yillardin buyan Uyghur élining lopnur rayonida 47 qétimliq atom bombisi siniqi élip barghan. Rayondiki Uyghurlar atom radi'atsiye tesirige uchrash sewebidin her xil yaman xaraktérlik késellerge giriptar bolup, bu rayonning ékologiyisi éghir derijide bulghan'ghanliqi xelq'arada élan qilin'ghan idi. Emma xitay hökümiti hazirgha qeder atom radi'atsiyisi ziyinigha uchrighan Uyghurlargha tölem bérilidighanliqi heqqide héchqandaq ipade bildürmigen bolup, bu ehwal Uyghurlarning naraziliqini qozghap, dunya Uyghur qurultiyi qatarliq Uyghur teshkilatliri hem xelq'ara teshkilatlarning xitayni eyiblishidiki muhim mesililerning birige aylan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet