خىتاي ساقچىلىرى مېھمانخانىغا كىرىپ 3 نەپەر ياپون مۇخبىرىنى ئۇردى

خىتاي دائىرىلىرى تۈنۈگۈن كېچىدە بېيجىڭدا مېھمانخانىغا كىرىپ 3 نەپەر ياپونىيە مۇخبىرىنى ئۇردى. بىرلەشمە ئاگېنتلىقىنىڭ بېيجىڭدىن بايان قىلىشىچە، تۈنۈگۈن كېچىدە بېيجىڭنىڭ چاڭئەن كوچىسغا يېقىن جايلاشقان 'بېيجىڭ مېھمانخانىسى'دا، ياپونىيە كيوتو ئاگېنتلىقىنىڭ مۇخبىرلىرى خىتاينىڭ 60 يىللىق تەبرىك كۈنى ئۈچۈن ئېلىپ بېرىلىۋاتقان پارات تەييارلىقى ھەققىدە خەۋەر تەييارلاۋاتقاندا، خىتاي دائىرىلىرى مېھمانخانىغا كىرىپ، ئۈچ نەپەر ياپونىيە مۇخبىرىنى ئۇرۇپ، تىپىپ ھاقارەتلىگەن ۋە ئۇلارنىڭ كومپۇتېرلىرىنى تارتىۋالغان.
ﻣﯘﺧﺒﯩﺮﯨﻤﯩﺰ ﯞﻩﻟﻰ
2009.09.19

بۇ، خىتايدا خوڭكوڭ مۇخبىرلىرى 'ئۈرۈمچىدە ئۇيغۇرلارنى قۇتراتتى' دەپ ئۇرۇلغاندىن كېيىن يۈز بەرگەن يەنە بىر قېتىملىق مۇخبىرلارنى ھاقارەتلەش ۋەقەسى بولۇپ ھېسابلىنىدۇ.

ب ب س نىڭ بايان قىلىشىچە، خىتاي تاشقى ئىشلار مىنىستىرلىكى ئۇچۇر ۋاستىلىرىغا 9‏ - ئاينىڭ 6‏ - كۈنىدىكى پارات تەييارلىقىنى رەسىمگە ئالماسلىقنى ئۇقتۇرغان بولسىمۇ، ئەمما ئۇنىڭدىن كېيىن بۇنىڭغا ئوخشاش ئۇقتۇرۇش چىقارمىغان ئىدى. ھازىر بېيجىڭدا قوللىنىلىۋاتقان بىخەتەرلىك تەدبىرلىرى، كىشىلەردە تېخىمۇ بەك جىددىيلىك تۇيغۇسى پەيدا قىلىۋاتىدۇ.

بېيجىڭنىڭ چاڭئەن كوچىسىدا ھازىر تانكا، باشقۇرۇلىدىغان بومبا ئورۇنلاشتۇرۇلغان ھەربىي ئاپتوموبىللارمۇ يۈرۈۋېرىدىغان بولۇپ قالدى. ھەربىيلەر مەشق قىلىدىغان كوچىدا قاتناش توختۇتىلىپلا قالماي، شۇ كوچىغا يېقىن جايدىكى مەكتەپلەر، دۇكانلارمۇ تاقىۋېتىلدى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.