ياۋروپا بىرلىكى خىتاي ۋە ھىندىستاندىن كىرىدىغان زەھەرلىك ماددىلارنىڭ كۆپىيىۋاتقانلىقىنى بىلدۈردى

بىرلەشمە ئاگېنتلىقىنىڭ خەۋىرىدە ئېيتىلىشىچە، بۇ دورىلار ئاساسەن خىتاي ۋە ھىندىستاندىن كېلىدىغان بولۇپ، بۇ يىل ياۋروپاغا كىرگەن دورىلارنىڭ تۈرى ۋە مىقدارى ئىلگىرىكى يىللاردىن كۆرۈنەرلىك ھالدا زور بولغان.

دائىرىلەرنىڭ بىلدۈرۈشىچە، قانۇنسىز زەھەرلىك ماددا تۈرىگە كىرىدىغان بۇ خىل دورىلار مەخسۇس تور بېكەتلەر ئارقىلىق «مۇنچا تۇزى»، «ئۆسۈملۈك ئوزۇقى» دېگەنگە ئوخشاش ئوخشىمايدىغان ئىسىملار بىلەن سېتىلىدىكەن. ياۋروپا بىرلىكى خىتاي ۋە ھىندىستاندا ئىشلەپچىقىرىلغان زەھەرلىك دورىلارنىڭ ياۋروپا بازىرىغا ئىلگىرىلەپ كىرىشىنى چەكلەش ئۈچۈن قانۇن چىقىرىش تەكلىپىنى ئوتتۇرىغا قويغان. ئەمما ئۇلار بۇ باسقۇچ ئاياغلاشقۇچە بولغان ئارىلىقتا ئاۋام خەلققە بۇ دورىلارنىڭ ئادەم تېنىگە قاتتىق زىيانلىق ئىكەنلىكى ھەققىدە ساۋات بېرىشنىڭ ھەممىدىن مۇھىملىقىنى بىلدۈرگەن.

ئاۋسترىيە، ئىرېلاندىيە ۋە رۇمىنىيە قاتارلىق بىر قىسىم ياۋروپا دۆلەتلىرى بولسا ئاللىقاچان بۇنىڭغا قارشى قانۇننى يولغا قويغان.