Xitayda yerlik hökümetke narazi bolghan bir ayal özini partlatti

Yünnendiki qurulush sewebidin öy-zéminidin ayrilip qalghan bir ayal özini bomba bilen partlatti. Peyshenbe küni meydan'gha kelgen weqede jem'iy 2 kishining ölgenliki, 14 kishining yarilan'ghanliqi xewer qilinmaqta.
Muxbirimiz irade
2012.05.10

Yaridarlardin tötining hayati xewp astida bolup, ular kunmingdiki doxturxanigha yötkep kétilgen.

Fransiye agéntliqining xewer qilishiche, weqede ölgen yene bir kishimu ayal bolup, u shu yerdiki ahaliler bilen öy-zémin, tölem ishlirini béjiriwatqan yerlik hökümet xadimi iken. Weqeni körgüchilerning éytishiche, yer igisi ayal, hökümet xadimi uni toxtamnamige qol qoyushqa qistighandin kéyin bombini partlatqan we neq meydanda hayatidin ayrilghan.

Öy-zémin dawasi xitayda yéqinqi yillardin buyan eng köp körülüwatqan ijtima'iy mesililerning biri. Türlük qurulush pilanliri sewebidin öy-zéminidin ayrilip qalghan xelq hökümetning özlirige yéterlik miqdarda tölem bermey, zomigerlik qiliwatqanliqidin qattiq narazi bolmaqta.

Aldinqi yili yuqiri sür'etlik tash yol qurulush sewebidin öyidin ayrilip qalghan chyen mingji isimlik kishimu bomba partlitip 2 kishini öltürgen idi. Emma u derdini anglaydighan birmu adem tapalmighanliqtin mushundaq yolni tallashqa mejbur bolghanliqini éytqan idi. Hazir yer-mülk dawasi sewebidin béyjingda erz qilip turuwatqan Uyghur erzdarlarning sanimu az emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.