“Asasiy qatlamgha chüshürüp chéniqturush” kadirlarghimu éghir bésim bolmaqta

Muxbirimiz gülchéhre
2014.03.05
asasiy-qatlam-xizmet-guruppisi.jpg Uyghur aptonom rayonluq idare-organlardin, 5826 qétimliq poyizgha olturup, xoten'ge asasiy qatlam xizmiti üchün kétiwatqan xizmetchiler. 2014-Yili 3-mart, ürümchi.
www.gov.cn

Xitay hökümiti Uyghur élida bu yildin bashlap 3 yilgha qeder, aptonom rayon'gha biwasite qarashliq tarmaqlar, orunlar we merkezning Uyghur aptonom rayonda turushluq orunliridin jem'iy 200 ming kadir we xadimni “El rayini igilesh, xelq turmushigha étibar bérish, awam könglini mujessemlesh” pa'aliyiti namida asasiy qatlamlargha ewetilidighanliqini élan qilip, tunji türkümde 70 minggha yéqin kadir asasiy qatlamgha ewetishke bashlidi.

Asasiy qatlamlargha chüshidighan xizmet guruppilirining asasiy qatlamdiki wezipisi 6 aydin bir yilgha qeder bolup, gerche da'iriler bu xil wezipige kadirlarning ixtiyari halda tizimgha éliniwatqanliqini teshwiq qiliwatqan bolsimu, bu xil keng kölemlik asasiy qatlamgha chüshürüsh wezipisi tuyuqsiz we buyruq bilen ijra qiliniwatqan iken, inkaslardin da'irilerning kadirlarni asasiy qatlamgha chüshürüsh siyasitining nurghun kishilerge we ularning a'ililirigimu zor bésim, xatirjemsizlik we turmush qolaysizliqlirini yaritiwatqanliqi melum. Muxbirimiz gülchéhrening bu heqte teyyarlighan programmisi diqqitinglarda bolsun.

Uyghur aptonom rayonluq partkomning “Islahat yéngiliq yaritishni chongqurlashturup, küchni mujessemlep ebedi eminlikni saqlash” yürüshlük pa'aliyitining biri süpitide aptonom rayon'gha biwasite qarashliq organlarning tunji türkümdiki 70 ming kadirni asasiy qatlamgha ewetish 5-marttin burun emeliyliship bolidu.

Xitay da'iriliri bu nöwet asasiy qatlamgha terbiyileshke chüshürgen kadirlargha asasiy qatlamlarda“...Kishi qelbini illitidighan ishlarni köprek qilish,zamaniwi medeniyetke bashlamchi bolushni gewdilendürüp, din bilen inaq ötüshni ilgiri sürüsh,türlük muqimliqni saqlash tedbirlirining emeliylishishini ching tutup ebedi emin ötüshning asasini puxtilash...” dégenlerni asasliq xizmet wezipisi qilip yüklidi.

Xitay da'iriliri asasiy qatlamgha xizmet guruppisi ewetishtiki meqset “Organ kadirlirini chéniqturush, muqimliqni saqlap, hökümetning roshen közi bolush rolini jari qildurush” dep tekitlimekte.

Aptonom rayonluq melum organdin xotenning melum yézisigha chüshken ismini ashkarilashni xalimighan bir kadirning melumat bérishiche, her derijilik xizmet guruppiliri xizmet nuqtilirida ziyaretke bérish, söhbetlishish, emeliy tekshürüsh qatarliq shekiller arqiliq déhqanlargha siyasetni teshwiq qilip, mes'uliyet rayonini teshebbuskarliq bilen tonuwélish, nuqtini kötire élishni bölek (kocha) lergiche emeliyleshtürüshni ishqa ashurup, a'ililergiche alaqilishish tori berpa qilidiken. Kadirlarni terbiyilesh kursida, asasiy qatlamgha chüshken kadirlar déhqanlarning a'ilisige we étiz-ériq boylirigha bérip, kötire alghan bölektiki ahalining asasiy ehwali, kirim menbesi, ijtima'iy pa'aliyiti, shundaqla ijtima'iy ehwali bilen tonushup, yézilardiki ziddiyet, majiralar boyiche “Qiziq nuqta, qiyin nuqta” mesililirini igilesh, el rayi uchur deptiri tutup, muqimliqni saqlash yoshurun xewpi, bixeterlik boyiche yoshurun xewp, bix xaraktérlik weqe qatarliq türlük ziddiyetlerni her heptide kentte turushluq xizmet guruppisi, kent we yéza-bazarlargha inkas qilip, asasiy qatlam teshkilatlirining öz tewelikidiki ehwallarni igilesh we tizginlesh iqtidarini östürüshtek xizmet taktikiliri boyiche terbiyilen'gen.

Bu kadir gerche balisi téxi yashqa toshmighan bolsimu, a'ilisini tashlap bu wezipige chüshüshke mejbur ikenlikini, eger wezipini ret qilghanda, bundin kéyinki istiqbalining zor tesirge uchraydighanliqini, hetta özining siyasiy köz qarishigha guman peyda bolidighanliqini bildürdi.

Uning éytishiche, ürümchide, bolupmu aptonom rayon derijilik organlardin bu qétim jenubqa bir yilliq xizmetke mangghan nurghun kadirlar öz ixtiyarliqi bilen emes, mejbur bolghanliqi üchün a'ilisini tashlap töwen'ge chüshüwatqanliqini, bu tuyuqsiz kelgen wezipining ulargha rohiy, iqtisadiy bésim we normal a'ile munasiwiti, hayatighimu oxshimighan selbiy tesir élip kélidu dep qarawatqanliqini ipade qildi.

Xitay éytiwatqan “Inaq jem'iyet” ning berpa bolushi, aldi bilen a'ililerning inaqliqidin bashlinidu elwette, amérikidiki Uyghur ziyaliy ilshat hesen ependi, xitayning bu qétimliq kadirlarni qayta terbiyilesh herikitining kadirlarning a'ile inaqliqi, turmush xatirjemlikigimu selbiy tesirlerni peyda qilip, axirida Uyghur jem'iyitining saghlamliqighimu éghir buzghunchiliq yaritidighanliqini nezerdin saqit qilishqa bolmaydighanliqini agahlandurdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.