Atushta 5 lagér barliqi, lagérdiki bir yataq nomurining 3513 ikenliki ashkarilandi

Muxbirimizning atushqa qarita élip barghan téléfon ziyaretliri dawamida atushta besh lagér barliqi, bu besh lagérning atush sheher ichidin 10 kilométir uzaqliqtiki sana'et rayonida yanmu-yan orunlashqanliqi ashkarilandi. Kent sékrétarliridin biri öz kentidin ekétilgen bir tutqunning 2‏-terbiyelesh merkizidiki 3513‏-yataqta ikenliki we bu 2‏-terbiyelesh merkizide 10 bilen 20 ming arisida kishi barliqini tilgha aldi.

Melum bolushiche ilgiri atushta doxturxana we partiye mektep qatarliq bir qanche orun'gha jaylashqan yighiwélish lagérliri yéqinda atushning sana'et rayonigha jemlen'gen. Melum bolushiche, 1 din 5 ke qeder nomur bilen atalghan 5 lagér derwaziliri ayrim-ayrim halette yanmu-yan orunlashturulghan iken. Atushtiki lagérlarning orni we sani heqqide melumat bergen saqchi xadimi lagérdiki tutqunlarning omumi sani heqqide melumat bérelmidi. Téléfonimizni qobul qilghan bir kent sékrétari özi turushluq kentidin ekétilgen salam abduraxman isimlik bir tutqunning 2‏-terbiyelesh merkizining 3513‏-nomurluq yatiqida ikenlikini ashkarilidi. U yataq nomur tertipining 5 lagérda bir tutash ikenliki yaki herbir lagérning öz aldigha ikenliki heqqide melumati yoqluqini éytti. Emma u 2‏-terbiyelesh merkizining özidila 10-20 ming arisida kishi barliqini ilgiri sürdi.

Bu sékrétarning bayan qilishiche, salam abduraxman melum bir gumandar bilen téléfonda sözliship qalghanliqi üchün tutulghan. Amérikida yashawatqan siyasiy pa'aliyetchi, amérika Uyghur birleshmisining re'isi ilshat hesen ependi atush xelqining tijaretke mahirliqi, xelq'ara bilen alaqisining nisbeten kengliki, xitayning ikki yildin buyanqi tutqunda chet'elge chiqqanlarni muhim nishan qilghanliqini eskertip, atushta yighiwélish lagérigha solan'ghanlarning pewqul'adde köp bolush éhtimalliqini otturigha qoydi. U yene atushta besh lagér barliqi we bir yataq nomurining 3513‏ ikenlikini nezerde tutqan halda atushta lagérdikiler sanining 50 ming bilen 80 ming arisida ikenlikini otturigha qoydi.

Atush sheherlik hökümet Torida Bayan qilinishiche, atushta Uyghur nopusi 228 ming, qirghiz nopusi 31 ming etrapida bolup, nöwette atushtiki mezkur 5 lagérda Uyghur we qirghizlardin bolup, az dégende 20 pirsent nopusning lagérda ikenliki perez qilinmaqta.