Awstraliyede “Untulghan xelq-Uyghurlar” namliq xelq'araliq muhakime yighini ötküzüldi

“Untulghan xelq-Uyghurlar” namliq xelq'araliq muhakime yighinidin körünüsh. 2014-Yili 22-noyabir, awstraliye.

“Untulghan xelq-Uyghurlar” namliq xelq'araliq muhakime yighinining uqturushi. 2014-Yili 22-noyabir, awstraliye.

22-Noyabir awstraliyening sydéniy shehiridiki xelq'ara izden'güchiler teshkilatining merkizide “Untulghan xelq-Uyghurlar” namliq xelq'araliq ilmiy muhakime yighini ötküzülgen.

Mezkur muhakime yighini awstraliyediki xelq'ara izden'güchiler teshkilati bilen shu yerde pa'aliyet élip bériwatqan Uyghur teshkilatliri we shundaqla mezkur teshkilatining merkizide islamiy ilim éliwatqan bir qisim Uyghurlarning hemkarlishishi bilen birlikte élip bérilghan.

Bu nöwetlik xelq'ara muhakime yighinigha awstraliyediki xelq'ara kechürüm teshkilatidin déborah migin, xelq'ara izden'güchiler merkizining mes'uli islam diniy alimi imam afroz aliy, jenubiy awstraliye islam diniy jem'iyitining re'isi, Uyghurlarning islam diniy alimi abdusalam abdughéni alim, dunya Uyghur qurultiyining mu'awin re'isi doktor memtimin ela, awstraliye Uyghur jem'iyitining re'isi jür'et we shundaqla awstraliyediki bir qisim musulman teshkilatlirining mes'ulliri teklip qilin'ghan.

Yighin qur'an kerimini télawiti bilen bashlan'ghan bolup, yighinda aldi bilen Uyghurlargha wakaliten söz qilghan bextiyar ependi barliq méhmanlarning qimmetlik waqtini serp qilip yighin'gha qedem teshrip qilghanliqigha öz rehmitini bildürgen.

Yighinda bir qisim teklip qilin'ghan méhmanlar nöwet bilen söz qilghan bolup, ular sözide asasliqi Uyghur mesilisini islam dunyasigha anglitish ehwalining yéterlik bolmasliqi, qandaq qilghanda Uyghur dawasini pütkül musulmanlar ortaq köngül bölidighan bir mesilige aylandurghili bolidighanliqi heqqide toxtalghan.

Yighin etigen sa'et sekkizdin kech sa'et sekkizge qeder dawamlashqan bolup, yighin jeryanida méhmanlar aldin teyyarlan'ghan lezzetlik Uyghur yémek-ichmeklirige, tatliq turumlirigha éghiz tekken.

Biz yighin axirlashqandin kéyin, mezkur yighin heqqide toluq melumatqa érishish üchün yighinda söz qilghan bextiyar ependi, jenubiy awstraliye islam diniy jem'iyitining re'isi islam diniy alimi abdusalam abdughéni alim we shundaqla dunya Uyghur qurultiyining mu'awin re'isi doktor memtimin ela bilen téléfon söhbiti élip barduq.

Yuqiriqi awaz ulinishidin tepsilatini anglang.