Австралийәдики уйғур паалийәтчиләр: җәмийитимиздики хитай тәрәпдарлири пәскойға чүшти

Мухбиримиз шөһрәт һошур
2016-11-30
Share
kokbayraq-awtraliye-xitay-chaghan-paaliyitide-1.jpg Австралийәдә хитай әлчиханиси тәрипидин уюштурулған “ғәрбий австралийә-җуңго шинҗаң мәдәнийәт фестивали” да икки уйғур йигити айюлтузлуқ көкбайрақни чиқарған көрүнүш. 2016-Йили 8-феврал, седний.
Social Media

Австралийәдики бир қисим хитай тәрәпдари уйғурлар, бу йил хитайниң чаған мәзгилидә хитай әлчиханиси билән һәмкарлишип седний тиятирханисида аталмиш “шинҗаң фестивали” өткүзгән. Фестивал уйғур паалийәтчилириниң залда айюлтузлуқ көк байрақни чиқириши билән йеримида тохтиған иди. Әйни чағда радийомиз зияритини қобул қилған аблимит садиқ өзиниң хитай тәрәпдари икәнликини йошурмиған вә униң бу мәйдани, уйғур паалийәтчилириниң қаттиқ тәнқидигә учриған. Мәлум болушичә, әнә қетимлиқ ахбарат зияритидин кейин, уларниң җамаәт ичидә авази өчкән, һәрикәтлириму пәскойға чүшкән.

Өткән айдики сайламда сайланған, австралийә уйғур җәмийитиниң рәиси мәмтимин әла вә җәмийәтниң актип әзалиридин бәхтияр бөрә әпәндиләр австралийәдики уйғурларниң омумий әһвали һәққидики сөһбитимиз давамида, седнийдики хитай тәрәпдари кишиләрниң уйғур җамаити ичидики орни вә һәрикити һәққидиму тохталди. Уларниң баян қилишичә, аблимит садиқ радийомизда өз мәйданини ашкара ипадилигәндин кейин, австралийәдики уйғур җамаити омумйүзлүк һалда униңдин өзини тартқан. Нәтиҗидә аблимит садиқниң хитай тәрәпдари һәрикитиму пәскойға чүшкән.

Мәмтимин әла бу һәқтики мулаһизисидә, аблимит садиқниң 1960-йиллардики хитайниң қизил тәшвиқатида меңиси ююлғанлиқини, әнә шу чағдики зеһнийәт билән бүгүнки дәврдики уйғур җамаитини қайил қилмақчи яки қаймуқтурмақчи болғанлиқини, әмәлийәттә өзиниң ич-бағрини ашкарилап қойғанлиқини, нәтиҗидә җамаәт ичидә йетим қалғанлиқини баян қилди. Бәхтияр әпәнди болса, әгәр хитай тәрәпдарлири қилмишлириға пушайман қилип, һәқ вә адаләт йолини таллиса, җәмийәтниң уларға йәнә қучақ ачидиғанлиқини, әмма уларниң бузғунчилиқ һәрикәтлиригә һәр вақит пәхәс болидиғанлиқини баян қилди.

Тәңритағ ториниң өткән айдики хәвиридин қариғанда, чәтәлдики бир түркүм хитай тәрәпдари уйғурлар йәнә хитай даирилири тәрипидин үрүмчигә дәвәт қилинған. Хәвәрдики көрүнүшләрдин һәм юқириқи икки паалийәтчиниң мәлуматлиридин қариғанда, мәзкур зиярәт өмикидә седнийдин қатнашқанлар болмиған. Аблимит садиқ униң алдидики һәр қетимлиқ зиярәт өмикидә баш рәттә иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт