Awstraliyediki Uyghur pa'aliyetchiler: jem'iyitimizdiki xitay terepdarliri peskoygha chüshti

Awstraliyediki bir qisim xitay terepdari Uyghurlar, bu yil xitayning chaghan mezgilide xitay elchixanisi bilen hemkarliship sédniy tiyatirxanisida atalmish “Shinjang féstiwali” ötküzgen. Féstiwal Uyghur pa'aliyetchilirining zalda ayyultuzluq kök bayraqni chiqirishi bilen yérimida toxtighan idi. Eyni chaghda radiyomiz ziyaritini qobul qilghan ablimit sadiq özining xitay terepdari ikenlikini yoshurmighan we uning bu meydani, Uyghur pa'aliyetchilirining qattiq tenqidige uchrighan. Melum bolushiche, ene qétimliq axbarat ziyaritidin kéyin, ularning jama'et ichide awazi öchken, heriketlirimu peskoygha chüshken.

Ötken aydiki saylamda saylan'ghan, awstraliye Uyghur jem'iyitining re'isi memtimin ela we jem'iyetning aktip ezaliridin bextiyar böre ependiler awstraliyediki Uyghurlarning omumiy ehwali heqqidiki söhbitimiz dawamida, sédniydiki xitay terepdari kishilerning Uyghur jama'iti ichidiki orni we herikiti heqqidimu toxtaldi. Ularning bayan qilishiche, ablimit sadiq radiyomizda öz meydanini ashkara ipadiligendin kéyin, awstraliyediki Uyghur jama'iti omumyüzlük halda uningdin özini tartqan. Netijide ablimit sadiqning xitay terepdari herikitimu peskoygha chüshken.

Memtimin ela bu heqtiki mulahiziside, ablimit sadiqning 1960-yillardiki xitayning qizil teshwiqatida méngisi yuyulghanliqini, ene shu chaghdiki zéhniyet bilen bügünki dewrdiki Uyghur jama'itini qayil qilmaqchi yaki qaymuqturmaqchi bolghanliqini, emeliyette özining ich-baghrini ashkarilap qoyghanliqini, netijide jama'et ichide yétim qalghanliqini bayan qildi. Bextiyar ependi bolsa, eger xitay terepdarliri qilmishlirigha pushayman qilip, heq we adalet yolini tallisa, jem'iyetning ulargha yene quchaq achidighanliqini, emma ularning buzghunchiliq heriketlirige her waqit pexes bolidighanliqini bayan qildi.

Tengritagh torining ötken aydiki xewiridin qarighanda, chet'eldiki bir türküm xitay terepdari Uyghurlar yene xitay da'iriliri teripidin ürümchige dewet qilin'ghan. Xewerdiki körünüshlerdin hem yuqiriqi ikki pa'aliyetchining melumatliridin qarighanda, mezkur ziyaret ömikide sédniydin qatnashqanlar bolmighan. Ablimit sadiq uning aldidiki her qétimliq ziyaret ömikide bash rette idi.