Atalmish “Térrorgha qarshi awan'gart” wang gangning ish-izlirining chinliqi guman qozghidi (1)

Xitay j x tarmaqliri 1-aprél küni élan qilghan inqilabiy qurbanlar tizimlikidin melum bolushiche, tizimliktiki Uyghur rayonigha tewe 33 neper saqchining 17 nepiri yürek késili bilen ölgen.

Xitay da'iriliri bay kömürkan hujumchilirini bir terep qilishta özliri üchün xizmet körsetken xitay qoralliq qisim etret bashliqi wang gang heqqide ötken hepte keng kölemde teshwiqat pa'aliyiti élip bardi.

Shinxu'a tori we s s t w qatarliq xitayning gholluq axbaratlirida élan qilin'ghan wang gang heqqidiki tepsiliy xewerde uninggha “Térrorgha qarshi awan'gart” dep nam bérilgen we uning 56 kün dawam qilghan qoghlash we yoqitish opératsiyeside körsetken atalmish baturluqi we pidakarliqigha medhiye, apirinlar oqulghan. Emma inkaslardin melum bolushiche, maqalilerde tilgha élin'ghan wang gangning ish-izlirining chinliqi oqurmen we anglighuchilarda guman qozghighan.

Xewerlerde wang gangning 56 kün öyge qaytmighanliqi pidakarliq süpitide tilgha élin'ghan, emma oqurmenlerdin biri, Uyghur rayonida öyge qaytmay wezipe öteshning adettiki ehwal ikenlikini tilgha alghan we yézilargha chüshken kadirlarning yil boyi öyige qaytmaywatqanliqini pakit qilip körsitip, wang gangning 56 kün öyige qaytmasliqining pidakarliq bilen alaqisi yoqluqini otturigha oyghan, u yene bu nuqtida xitay qoralliq qisimlirining yuqiri ma'ash teminati barliqini eskertken. Xewer arisidiki bir mawzuda wang gang qomandanliq qiliwatqanda qulaq tüwidin oqlar uchup turghanliqi tilgha élin'ghan, xewerdiki yene bir tepsilatta gumandarlar aptomatik qorallar bilen qarshiliq körsitiwatqan bolghachqa, esker we ofitsérlarning öngkür éghizigha yéqinlishalmighanliqi teswirlen'gen, emma xewerning yene bir bölikide, öngkürge qaritip otchachar qollinilghandin kéyin öngkür éghizidin gumandarlarning pichaq we xenjer kötürüp étilip chiqqanliqi teswirlen'gen. Maqalidiki bu zitliqtin xijilliq hés qilghan bir oqurmen, mezkur zitliqni tilgha élip xitay teshwiqat wasitilirini mentiqliq gep qilishqa ündigen we maqalidiki ikki tepsilattin birining choqum oydurma yaki köptürme ikenlikini bayan qilghan. Wetenperwer texellusluq yene bir oqurmen bolsa, gumandarlarning qolida ular öltürgen térek bazar saqchiliri, alahide saqchi bashliqi we xadimi, shundaqla saqchi bashliqi memet toxtiniyazdin tartiwalghan qorallar barliqini tilgha élip, gumandarlarning aptomatik qorallirida oq tügigendin kéyin, pichaq bilen étilip chiqqanliq éhtimalliqini ilgiri sürgen؛ emma yene bir oqurmen bolsa maqalide bu nuqtilarning aydinglashturulushi kéreklikini, axbaratning oqurmenlerni sadda chaghlimasliqini we da'irilerning xelqni öz teshwiqatigha zorlap ishendürüsh métodin waz kéchishini tewsiye qilghan.

Mezkur maqalide déyilishiche, wang gang bir küni yolda ghemkin kétiwatqan 9 yashliq bir qizni uchratqan we uni chaqirip hal-ehwalini sorighan, qiz dadisi doxturxanida aghriq bolghachqa, mektepni dawamlashturalmighanliqini bayan qilghan؛ shuning bilen wang gang doxturxanigha bérip qizning dadisigha iqtisadiy jehettin yardem qilghan we bu qizning mektepni dawamlashturush arzusini emeliyleshtürüp bergen. Maqalide wang gang yardem qildi déyilgen bu qizning ismi aygül déyilgen, emma uning qaysi nahiye, qaysi yézida olturushluq a'ilidin ikenliki we wang gang yoqlap barghan doxturxanining qaysi doxturxana ikenliki tilgha élinmighan. Hemmige melumki, xewerde orunning ayding bolushi axbarattiki eng eqelliy 6 teleptin biri. Yardem qildi déyilgen 9 yashliq aygülning orun tewelikining yézilmasliqimu bir qisim oqurmenlerde guman qozghighan. Biz bu nuqtining chinliqini éniqlash üchün aqsu baydiki alaqidar orunlargha téléfon qilduq. Aqsuda wezipe ötewatqan bir saqchi xadimi, wang gangning yuqiriqidek ish-izliridin xewersizlikini éytti. Xitay axbaratliridin melum bolushiche, wang gang buningdin 6 ay burunmu bir qétim mukapatlan'ghan we ish-izliri Uyghur rayonida keng-kölemde teshwiq qilin'ghan, hetta saqchilarning kündilik siyasiy öginish pa'aliyetliride wang gang heqqidiki yazma matériyallar ögitilgen, emma téléfon ziyaritimiz dawamida, bezi saqchilar wang gangning ish-izila emes, kimlikidinmu xewersizlikini éytti.

Melum bolushiche, wang gangning nam-sheripi Uyghur saqchi-xadimlirighimu qarangghu, Uyghur saqchilardin biri, wang gang heqqidiki so'allirimizgha melumatsizliqi sewebidin jawab bérelmidi.

Alte ay burun heqqide teshwiqatlar bashlan'ghan, bir hepte awwal yene xitay miqyasida ish-izliri xewer qilin'ghan atalmish “Térrorgha qarshi awan'gart” wang gangning kimliki we ish-izlirining Uyghur rayonidiki saqchi xadimliri teripidinmu eslinelmesliki, wang gangning ish-izlirining chinliqi heqqidiki gumanning nisbeten omumiyliqidin we uning tesiridin isharet bermekte.