Dolqun eysa: "Xitayning b d t diki pozitsiyesi Uyghur diyaridiki lagérlar mesilisini xelq'aralashturidu"

Ixtiyariy muxbirimiz ekrem
2018-08-15
Élxet
Pikir
Share
Print
B d t ning irqiy ayrimichiliqni tügitish komitétining yighinida, xitay wekilliridin so'al soralmaqta. 2018-Yili 13-awghust, jenwe.
B d t ning irqiy ayrimichiliqni tügitish komitétining yighinida, xitay wekilliridin so'al soralmaqta. 2018-Yili 13-awghust, jenwe.
webtv.un.org

Xitay hökümitining b d t ning irqiy ayrimichiliqqa qarshi turush yighinida Uyghur diyaridiki yighiwélish lagérlirining mewjutluqini inkar qilghanliqi xelq'ara metbu'atlarda qiziq téma bolmaqta.

Jenwede 6-awghust bashlan'ghan b d t irqiy ayrimichiliqqa qarshi turush komitétining 96-nöwetlik yighinida xitayning kishilik hoquq weziyiti közdin köchürülgen, 10-awghust küni 49 neper xitay wekiller ömikige b d t ning alahide doklat xadimliri teripidin yüzge yéqin so'al qoyulghan idi. 13-Awghust küni xitay wekiller ömiki so'allargha jawab bérip, Uyghur diyarida milliy zulum yoqluqini tekitlesh bilen birge yighiwélish lagérlirining mewjutluqini pütünley inkar qilghandin kéyin, xelq'ara metbu'atlarda bu mesile qiziq téma süpitide orun élishqa bashlidi.

D u q ning myunxéndiki bash shitabidin bügün igiligen melumatlargha asaslan'ghanda, yene köpligen xelq'araliq axbarat organliri d u q din Uyghur diyaridiki jaza lagérliri mesilisi we xitayning b d t da buni inkar qilghanliq mesilisi heqqide bes-beste ziyaretlerni qanat yaydurmaqta iken.

D u q ning re'isi dolqun eysa we mu'awin re'isi perhat muhemmidi ependiler bügün yene d u q tor téléwiziyeside söhbet ötküzüp, xitay hökümitining b d t da Uyghur diyaridiki jaza lagérliri mesilisini tüptin inkar qilghanliqigha qarita qurultayning pozitsiyesini bildürgen.

B d t irqiy ayrimichiliqqa qarshi turush komitétining 96-nöwetlik yighinigha d u q ning re'isi dolqun eysa bashliq 5 kishilik bir guruppa Uyghurlarmu qatnashqan idi. Perhat muhemmidi ependining bildürüshiche, d u q rehberliri tünügün kechte jenwedin qaytip kélipla re'isler yighini chaqirip, b d t diki yighin mesilisini muzakire qilghan hemde bu yil 11-ayda jiddiy rewishte "Sherqiy türkistan milliy kéngishi" yighini chaqirip, lagérlar mesilisini öz ichige alghan Uyghurlar weziyiti heqqide xelq'araliq kölemde bir muhakime élip baridighanliqini qarar qilghan.

D u q rehberlirining bildürüshiche, bu yil 11-ayning 9- we 10-künliri gérmaniyening myunxén shehiride "Sherqiy türkistan milliy kéngishi" yighini chaqirilish bilen bir waqitta, "Dunya Uyghur yashlirining uchrishishi" yighinimu chaqirilidiken hemde bu ikki yighindin 2 kün ilgiri, yeni 11-ayning 7- we 8-künliri d u q ijra'iye komitétining 2-nöwetlik kéngeytilgen omumiy yighini ötküzülidiken. 11-Ayning 10-küni chüshtin kéyin 1933-yili qurulghan sherqiy türkistan islam jumhuriyiti we 1944-yili qurulghan sherqiy türkistan jumhuriyitidin ibaret ikki jumhuriyetni xatirilesh pa'aliyiti ötküzüp, "Istiqlal marshi mukapati" ni tarqitish pa'aliyitimu birge ötküzülidiken. 8-Ayning 13-küni kechte élip bérilghan d u q ijra'iye komitéti téléfon yighinida yene bu yil 11-ayning 6-küni jenwediki b d t binasi aldida keng kölemlik namayish teshkillesh mesilisimu qarargha baghlan'ghan idi.

Toluq bet