Jing, börtala saqchiliri: “Yer tewridi , emma muqimliqni qoghdash birinchi xizmitimiz”

Muxbirimiz méhriban
2017-08-11
Share
Bortala-Yer-Tewresh-2017.jpg Jing nahiyiside yüz bergen 6.6 Bal yer tewreshtin kéyin, qutquzush etritidikiler toli yézisidiki örülgen öylerni tekshürmekte. 2017-Yili 9-awghust.
South China Morning Post

9-Awghust börtala oblasti jing nahiyiside 6.6 Bal yer tewrigendin buyan, xitayning döletlik yer tewreshni ölchesh idarisi, shinxu'a agéntliqi, xelq tori qatarliqlarda jingdiki yer tewreshtin kéyinki qutquzush xizmiti heqqide intayin az sandiki medhiye xewerliri bérildi. Emma, Uyghur aptonom rayoni we börtala oblasti qatarliq yerlik hökümet torlirida xitayche xewerler köchürüp terjime qilip bérilgendin bashqa, jing nahiyisidiki yer tewreshning emeliy ehwali heqqide tepsiliy xewerler bérilmesliki diqqet qozghighan idi. Jing nahiyisi we börtala shehirige téléfon qilghinimizda, puqralardin érishkinimiz “Süküt qilish” , saqchilardin érishken jawabimiz “Apettin qutquzushtinmu muhim xizmet ‏-jem'iyetning tinchliqigha kapaletlik qilish, yerlikning muqimliqini qoghdash” dégen sözler boldi.

Bügün yeni 11-awghust küni xitayning sichüen ölkisi jyu seyguda 8-awghust yüz bergen 7 bal yer tewreshke 3 kün, 9-awghust Uyghur aptonom rayonining börtala oblasti jing nahiyiside yüz bergen 6.6 Bal yer tewreshke 2 kün boldi. 

Xitay we xelq'ara taratqularda sichüendiki yer tewresh apitidin kéyinki ziyan we qutquzush heqqide xewerler birqeder köp bérildi. Emma, Uyghur diyarining jing nahiyiside yüz bergen 6.6 Bal derijidiki yer tewresh heqqidiki xewerler 10-awghust küni xitay merkizi hökümitige biwasite qarashliq sanaqliq taratqularda bérilgen “9-Awghusttiki yer tewreshte 32 adem yarilandi, 10 ming 500 adem yötkep orunlashturuldi, iqtisadiy ziyan 150 milyon yüen boldi” dégen xewerdin bashqa, apet keltürgen ziyan heqqide bashqa yéngi xewer bérilmidi. Uyghur aptonom rayonigha qarashliq “Shinjang géziti, tengritagh tori” qatarliqlarda bolsa , shinxu'a agéntliqi, xelq géziti qatarliqlarning apettin qutquzush xizmiti heqqidiki medhiye xewerliri terjime qilinip bérish bilenla cheklendi.

Halbuki, yer tewreshtin kéyinki börtala oblasti jing nahiyisining weziyiti heqqide biwasite ehwal igilesh üchün , bu qétimqi yer tewreshning merkizi bolghan jing nahiyisidiki jing baziri, toli yézisi qatarliq jaylardiki puqralarning öylirige qilghan téléfonlirimiz jawabsiz qaldi.

Börtala oblastliq xelq hökümiti, partkom we jing nahiyisidiki yéziliq hökümet ishxaniliri qatarliq jaylargha qilghan téléfonlirimizni alghan hökümet xadimliri bolsa, yer tewreshning ehwali heqqide uchur bérish cheklen'genliki toghriliq yuqirining mexsus buyruqi barliqini tekitlep, nahayiti qet'iylik bilen herqandaq ziyaretni qobul qilmaydighanliqini bildürdi.

Jing nahiyilik xelq hökümitining ayal xadimi:“Yer tewresh heqqidiki uchurlarni eng yaxshisi yer tewreshni qutquzush bash qomandanliq shtabidin sorang, chünki, bizning bu heqte uchur bérishimiz cheklen'gen” dédi.

Jing nahiyilik partkomning er xizmetchi xadimi: “Yer tewresh ehwali heqqide uchur bérelmeymiz, chünki bizge herqandaq muxbirning ziyaritini qobul qilmasliq heqqide uqturush bar. Shunga sizning yer tewresh apiti we bu jayning hazirqi weziyiti heqqide sorighan so'alliringizgha jawab bérelmeymiz. Eger muxbir bolsingiz , mushu jaygha kélip munasiwetlik hökümet organlirining ruxsitini éling” dédi.

Jing nahiyisi we oblast merkizi börtala shehiridiki saqchixanilargha qilghan téléfonimizni alghan saqchilarning yer tewresh apitidin kéyin yuqirining ulargha tapshurghan wezipisi heqqide bergen jawabi, birdek “Jing we börtalada yer tewresh apitidinmu muhim xizmet-jem'iyetning tinchliqigha kapaletlik qilish, yerlikning muqimliqini qoghdash” dégen sözler boldi.

Jing nahiyilik saqchi idarisidin téléfonimizni alghan nöwetchi saqchi mundaq dédi: “Shundaq, jing nahiyiside yer tewridi, emma bizge bérilgen asasiy wezipe yenila muqimliqqa kapaletlik qilish. Jing nahiyiside yüz bergen yer tewresh ehwali we yer tewresh rayonidikilerge yardem toghriliq biz saqchilargha héchqandaq uqturush qilinmidi. Biz barliq küchimiz bilen jing nahiyisi we börtala oblastining muqim-tinch weziyitige kapaletlik qilishqa tirishiwatimiz.”

Börtala sheherlik saqchi idarisidiki nöwetchi saqchining yer tewreshtin kéyin saqchilargha chüshürülgen wezipining “Muqimliq saqlash” ikenliki heqqidiki bayani téximu keskin boldi. U néme üchün rayonda muqimliq tekitlinidighanliqi we saqchilarning yer tewresh apitige yardem bérishke seperwer qilinmighanliqining sewebi heqqidiki so'allirimizgha mundaq jawab berdi: “Eger apet yüz bergen mushu künlerde muqimliq xizmiti ching tutulmisa, u chaghda börtala oblastigha oxshash tinch-muqim jay dep teripliniwatqan shimaliy shinjangning tinch weziyiti buzulup, bu jaylarmu jenubtiki xoten'ge oxshash tinchsiz-xeterlik jaygha aylinip qalmamdu?! shunga börtala oblast boyiche hemme yerde tekitliniwatqini muqimliq xizmiti. Oblastimizdiki hemme nahiyilerde muqimliq xizmiti tekitliniwatidu.”

Bu saqchi xadimi yene, nöwette Uyghur aptonom rayonining muqimliqini saqlashqa herbiyler, saqchilar hetta pütkül hökümet xadimliri seperwer qilin'ghanliqini bayan qilip: “Hazir muqimliq xizmiti peqet saqchilarningla wezipisi emes. Belki yéza kadirliri, yézilargha chüshürülgen xizmet etret kadirliri we bu yil yéngi yildin buyan mexsus tesis qilin'ghan xelq eskerliri hemmeylenning 1-wezipisi muqimliqni saqlash dep belgilendi. Shunga, shinjangni elwette eng bixeter jay dep qarisingiz bolidu. Bu yerdiki shunche köp qoralliq qisimlar we saqchilarning eng asasiy wezipimiz, herqandaq shara'itta bu jayning muqimliqqa kapaletlik qilish. Bu sewebtin hazir shinjang pütün memliket boyiche tinch-muqim rayon'gha aylandi. Bolupmu shimaliy shinjang rayonigha sayahet we bashqa ish üchün kelmekchi bolghan herqandaq kishi kimliki we munasiwetlik matériyallirini élip xatirjem kelse bolidu” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet