Dunya Uyghur qurultiyi wekilliri malaysiyadiki ziyaritini ghelibilik ayaghlashturdi

D u q ning toluq hawalisi bilen teshkillen'gen wekiller ömiki malaysiyadiki ziyaritining üchinchi künidimu muhim uchrishishlarda boldi. 2019-Yili 16-yanwar.

D u q ning toluq hawalisi bilen teshkillen'gen wekiller ömiki malaysiyadiki ziyaritining üchinchi künidimu muhim uchrishishlarda boldi. 2019-Yili 16-yanwar.

Dunya Uyghur qurultiyining wekilliri malaysiyadiki ziyaritining 3-künide yene bir qisim muhim pa'aliyetlerde bolghan. Malaysiyadiki 18 musteqil organning ortaq qollishi asasida “Uyghurlarni qollash guruppisi” qurush qarar qilin'ghan.

Malaysiyadiki alaqidar tereplerning teklipi we dunya Uyghur qurultiyining orunlashturushigha asasen d u q ijra'iye komitétining mudiri ömer qanat, amérika Uyghur birleshmisining re'isi ilshat hesen we d u q diniy ishlar komitétining mudiri turghunjan alawudun qatarliqlar malaysiyada ziyarette boluwatqan idi. Ular ziyaritining 3-künidimu bir qatar muhim uchrishishlarda bolghan. Bizge bu heqte melumat bergen ilshat hesen ependining bildürüshiche, ular 3-künidiki ziyaritide yene bir parlamént ezasi bilen uchrashqan. Bu parlamént ezasi xanim özining malaysiya parlaméntida “Uyghurlargha köngül bölüsh guruppisi” qurush pilanini qollaydighanliqini bildürgen.

Dunya Uyghur qurultiyi wekilliri yene we shundaqla malaysiyadiki 18 musteqil organning wekilliri bilen uchrishish ötküzgen. Bu uchrishishta Uyghurlar üchün qilinidighan xizmetler muzakire qilinip, bu heqte mexsus bir heriket pilani maqullan'ghan.

Mezkur 18 organ yene pat arida “Uyghurlarni qollash guruppisi” qurush qararinimu maqullighan.

Ilshat hesen ependining éytishiche, malaysiyadiki bir qisim yashlar teshkilatliri bolsa birlikte “Uyghurlargha xizmet qilish guruppisi” qurup, alliqachan pa'aliyetlirini bashlap bolghan iken.

Dunya Uyghur qurultiyi wekilliri malaysiyadiki ziyaritining 3-küni we shundaqla axirqi künini mana mushundaq ayaghlashturup, hindonéziyening jakarta shehirige yürüp ketken.

Ular ziyaritining birinchi we ikkinchi künliride malaysiyadiki bir qanche ministirlar, parlamént ezaliri we hökümetke qarashliq bolmighan organlar wekilliri, uniwérsitét oqughuchiliri we malaysiyadiki xitay musulmanliri teshkilatliri, ziyaliylar qatarliq hersahe zatliri bilen körüshüp, Uyghur mesilisi üstide muhim uchrishishlarda bolghan idi.