5-Нөвәтлик дуня уйғур қурултийиға қатнашқан японийә вәкиллириниң қарашлири

Дуня уйғур қурултийиниң 11-июл күни париж шәһиридә башланған 5-нөвәтлик қурултийи 13-июл күни ахирлишип, йиғин иштиракчилири өз җайлириға қайтишқа башлиған.

Мухбиримизниң хәвәр қилишичә, ондин артуқ дөләттики уйғур җамаити вә тәшкилатлириниң 130 дин артуқ вәкили, мутәхәссисләр, паалийәтчиләр қатнашқан мәзкур йиғин җәрянида әркин сайлам өткүзүлүп, йеңи рәһбәрлик гурупписи бекитилгәндин башқа йәнә қурултай җәрянида оттура асия җумһурийәтлири, явропа әллиридин кәлгән бир қисим вәкилләр өз тәшкилатлири, җәмийәтлири намидин дуня уйғур қурултийиниң буниңдин кейинки хизмәтлирини қандақ елип бериш вә уйғурларниң нөвәттики вәзийити һәққидә һәр хил пикирләрни оттуриға қойған һәм тәклипләрни сунған шуниңдәк әркин муһакимиләр елип барған.

Дуня уйғур қурултийи өзиниң буниңдин кейинки паалийәтлиридә оттура асия вә ғәрб әллиридин башқа йәнә японийәдики хизмәтлирини техиму күчәйтиш муһим дәп қариған болуп, японийәдин кәлгән вәкилләр йиғинда өзлириниң тәклиплирини актип оттуриға қоюп, қурултай рәһбәрлириниң диққитини тартқан. Мәлумки, дуня уйғур қурултийи рәиси рабийә қадир ханим башлиқ қурултай вәкиллири илгири көп қетим японийәдә зиярәттә болған иди. Ихтияри мухбиримиз һаҗи қутлуқ қадири йиғин ахирлашқандин кейин, японийәдин кәлгән уйғур вәкиллириниң көз қарашлирини игилиди.

Дуня уйғур қурултийиниң муавин рәис сейит түмтүрк д у қ ниң японийәдики хизмәтлириниң муһимлиқини тәкитлиди вә қурултайниң японийәдики уйғур җамаитидин немиләрни күтидиғанлиқини билдүрди.