Firansiyede Uyghur diyaridiki jaza lagérliri mesilisi tonushturuldi

Ixtiyariy muxbirimiz ekrem
2019.01.21
Share on WhatsApp
Share on WhatsApp
firansiye-turk-ojaqliri-uyghur.jpg Firansiyening mulxose shehiridiki “Ülke ojaqliri” teshkilati uyushturghan “Sherqiy türkistandiki jaza lagérliri we Uyghurlarning bügünki weziyiti” dégen témida mexsus doklat bérish pa'aliyitidin körünüsh. 2019-Yili 19-yanwar.
RFA/Ekrem

Firansiyediki türk teshkilatlirining wekillirige Uyghur diyaridiki jaza lagérliri mesilisi tonushturuldi.

Dunya Uyghur qurultiyi tetqiqat merkizining mudiri enwer ehmet ependining bergen melumatlirigha asaslan'ghanda, firansiyening mulxose shehiridiki “Ülke ojaqliri” teshkilati 19-yanwar küni firansiyediki 9 teshkilatning 200 din artuq wekillirini yighip “Sherqiy türkistandiki jaza lagérliri we Uyghurlarning bügünki weziyiti” dégen témida mexsus doklat bérish pa'aliyiti uyushturghan.

Mezkur pa'aliyetke d u q ning re'isi dolqun eysa ependi doklat bérishke teklip qilin'ghan bolsimu, lékin uning waqti yar bermigenliki üchün qurultay tetqiqat merkizining mudiri enwer ehmet ependi dolqun eysagha wakaliten doklat teqdim qilghan.

Enwer ehmet ependining éytishiche, türk teshkilatliri bu qétimqi yighin üchün alayiten türkiyedin ay-yultuzluq kökbayraqlarni ekeldürüp, yighin zalini sherqiy türkistanning kök bayraqliri bilen bézigen. Doklat teqdim qilish axirlashqandin kéyin, so'al-jawab pa'aliyiti bolup ötken. Bu qétimqi pa'aliyet 4 sa'et dawam qilghan hemde türk teshkilatliri xitayning jaza lagérlirigha qarshi d u q bilen öz-ara hemkarliship, bundin kéyin élip baridighan heriketler toghrisida muzakiriler élip bérilghan.

Melum bolghinidek aldinqi yili 21-dékabir küni gérmaniyening bérlin shehiridiki “Alp eren ojaqliri” namliq türk teshkilati jaza lagérlirigha qarshi xitay bash elchixanisi aldida namayish uyushturupla qalmay, shu küni bu teshkilatning bash shtabida jaza lagérliri toghrisida mexsus yighin ötküzüp, d u q re'isi dolqun eysa ependini doklat bérishke teklip qilghan idi.

Oxshashla gérmaniyening nürnbérg shehiridiki 5 tin artuq türk teshkilatlirimu 27-dékabir özlükidin Uyghur diyaridiki jaza lagérlirigha qarshi keng kölemlik namayish uyushturup, xitay hakimiyitini Uyghur diyaridiki jaza lagérlirini derhal taqashqa chaqirghan hemde özlirining herqachan zulum astidiki Uyghurlar bilen bir septe turidighanliqini jakarlighan idi.

Gérmaniye we yawropaning bashqa elliridiki türk teshkilatliri yéqindin buyan özlükidin qozghilip, xitay hakimiyitining Uyghur diyarida tesis qilghan jaza lagérlirigha qarshi pa'aliyetlirini barghanséri keng qanat yaydurmaqta. Bu xil pa'aliyetler türkiyede téximu ewjige chiqmaqta. Bundin birqanche hepte ilgiri malaysiya, hindonéziye qatarliq ellerdimu jaza lagérlirigha qarshi keng kölemlik namayishlar élip bérilghan idi.

Enwer ehmet ependining bildürüshiche, firansiyediki 10 din artuq türk teshkilatliri bu yil d u q bilen hemkarliship yawropa ittipaqining firansiyening sitrasburg shehiridiki merkizi binasi aldida keng kölemlik namayish élip baridiken hemde yawropa ittipaqigha we firansiye hökümitige telep sunup, xitayning Uyghur diyaridiki jaza lagérlirini derhal taqashni iltimas qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.