Ürümchide échiliwatqan ikki yighin dawamida qeyser ana-patigül ghulam yene nezerbend qilindi

Ürümchide düshenbe künidin bashlap échiliwatqan aptonom rayonluq siyasiy kéngeshning 11-nöwetlik, xelq qurultiyining 12-nöwetlik ikkinchi omumiy yighinliri seweblik Uyghur rayonida bixeterlik nuqtisidin tehdit dep qaralghan kishiler yene bir qétim omumyüzlük teqib we nezerbend astigha élindi.

Mana bulardin biri, ghayib oghlining iz-dérikini qilish jeryanida bir qétim 7 künlük qamaq jazasigha uchrighan we köp qétimlap xitay saqchilirining zorawanlarche soraqlirigha duch kelgen, emma yolidin yanmighan qeyser ana patigül ghulamdur. U bügünmu yene nezerbend astida turuqluq xitayning ürümchide échiliwatqan ikki yighin mezgilidiki zorawanliqlirini radi'omizgha pash qildi we shikayet qildi.

Patigül xanim ikki yighin échilishtin birqanche kün awwal, yighin meydanigha barmasliq heqqide agahlandurulghan؛ emma özige oxshash derdmen anilardin aypash, tuqiz qatarliqlar bilen birlikte ikki yighin échiliwatqan orundiki erziyet bölümining aldigha barghan. Ular erziyet bölümide erziyet xadimlirini uchratmighan, uning etrapida qeshqerdin kelgen 20-30 che erzdarlarni uchratqan. Bular asasen yer-zémin dawasi bilen erz qilip kelgenler bolup, ularmu atalmish xelq wekillirige derdini éytiwélish we yaki erziyet xadimlirigha shikayet qilish meqsitige yételmigen. Xitay qoralliq qisimlirining tosushi bilen yighin meydanigha yéqinlishalmighan erzdarlar bir-birige derd éytishqan we xitay hökümitini söküp shikayet qilishqan.

Patigül xanim seyshenbe künidin bashlap hem aghriq sewebi, hem qorudiki saqchilarning nazaret qilishi we öy ichige kirip yene tehdit sélishi seweblik öydin sirtqa chiqalmighan. Patigül xanim özige tehdit salghan saqchilargha burunqidekla achchiq tillar bilen dekke bérip, ularni öyidin qoghlap chiqarghan.

Weqening tepsilatini yuqiridiki awaz ulinishidin anglaysiler.