Ghoruchölde töt hujumchi ténige bomba téngip saqchilargha hujum qilghan

Yéqinqi ikki heptidin buyan aqsu wilayitining awat nahiyisi we uning etrapidiki jaylarda saqchi da'iriliri öymu-öy kirip axturush élip bérishqa bashlighan, awat nahiyisi weziyiti téximu jiddiy haletke kirgen, bolupmu ropashliq ayallar axturush tekshürüsh obyékti qilin'ghan.

Aqsu wilayiti awat nahiyisidin kelgen uchurlargha qarighanda, yéqinqi ikki heptidin buyan aqsuning her qaysi jaylirining siyasiy ijtima'iy weziyitini jiddiylik igiligen. Saqchi we hökümet da'iriliri öymu-öy kirip tekshürüsh, axturush élip bériwatqan bolup, kochida charlashqa saqchilar köpeytilgen. Puqralarning ish béjirish üchün türlük idare organlirigha kirip-chiqishi tesleshken. Bu uchurlargha asasen aqsu wilayetlik hökümetke téléfon qilduq. Nöwetchilikte olturuwatqan xadim, so'allirimizgha jawab bérip néme weqe yüz berginini bilmeydighanliqi, emma birdinla tüzümlerning chinglap 24 sa'et charlash we muhapizet qilish tüzümliri yolgha qoyulghanliqini bildürdi.

Awat nahiyisidiki bir Uyghur bolsa aqsu weziyitidiki bu jiddiylikning sewebi heqqide bir saqchi aghinisidin anglighan uchurlarni éytti, uning bildürüshiche, bundin on-yigirme kün awwal aqsuning awat nahiyisi ghoruchöl yézisida özini partlitish xaraktérlik hujum qilish weqesi yüz bergen bolup, ténige bomba tangghan üch er we bir ropashliq ayal yéziliq saqchixanigha hujum qilghan. Deslep ular saqchilargha pichaq bilen hujum qilghan we bir mehel tirkeshkendin kéyin üch er hujumchi saqchilargha özini étip teng partlap ölgen, ayal hujumchi qéchip ketken. Saqchilar nöwette terep-terepni axturup tirik qachqan bu ayalni izdewatqan iken.

Mezkur yip uchigha asasen ghoruchöl yézisidiki saqchi ponkiti we hökümet tarmaqlirigha köp qétim téléfon achqan bolsaqmu, téléfon liniyiside kashila barliqi eskertilip turdi, axiri yézidiki melum bir ayal kadirning öyige téléfon uliduq, emma u jawab bérishni ret qildi.

Awat nahiyilik xelq hökümitige téléfon qilghinimizda, közetchi xadim barliq kadirlar ning ghoruchölge jiddiy xizmetke chüshüp ketkenlikidin, u jayda chong bir weqe yüz berdi dep qiyas qiliwatqan bolsimu, da'iriler bu heqtiki uchurlarni intayin mexpiy tutuwatqan bolghachqa zadi qandaq ish yüz bergenlikidin xewiri yoqluqini bildürdi.

Bu heqte bir qeder tepsiliy uchur bergen awatliq yigitning bayanigha qarighanda, yéqinqi bir ikki aydin buyan aqsuda Uyghurlarning saqchixanigha hujum qilish weqeliri arqa-arqidin yüz bérip kéliwatqan bolup, saqchixanilar alahide qoghdash tedbirliri alghan. Saqchixanigha kirip-chiqquchilar tizimlinip, kimliki tekshürülgendin bashqa hetta ularning barmaq izlirini élish zörür tedbirge aylan'ghan. Bu alahide muqimliq tedbirliri puqralarning ish béjirishni téximu tesleshtürse, yene bir tereptin saqchilarning qolida héchnéme yoq adettiki puqralardin éhtiyat qilip bunche alahide qoghdinish tedbirliri élishi rahetsiz bir keypiyat yaratqan.

Ghoruchölning téléfon liniyisidiki kashila seweblik mezkur bomba téngip saqchixanigha hujum qilish weqeside qanche ademning ölgenliki we weqelik jeryani heqqide éniq melumatqa érishelmiduq, muxbirlirimiz bu heqte uchur élishqa dawamliq tirishmaqta.