Gollandiye Uyghur birlikide yéngi rehberler wezipige teyinlendi

Gollandiye Uyghur birlikining yéngi rehberlirini saylap chiqish yighinidin körünüsh. 2013- 15-Dékabir.

15‏-Dékabir gollandiye Uyghur birlikining yéghin zalida saylam pa'aliyiti ötküzülüp, yéngi rehberler wezipige teyinlendi. Ular xélidin béri tor yüzide élan bérip mezkur teshkilattiki xizmetlerni üstige élishni xalaydighanlarning özlirini tégishlik wezipilerge namzat qilip körsetse bolidighanliqini bildürgen idi.

Mezkur chaqiriqqa asasen bash re'islikke özlirini tewsiye qilghan üch namzattin ikkisi, yeni bextiyar nasir we zeynidin tursun ependiler “Abdusalam niyaz ependining re'is bolushini muwapiq” dep qaraydighanliqini bildürüp, namzatliqtin waz kechkenlikini élan qildi.

Shuning bilen abdusalam niyaz ependi gollandiye Uyghur birliki teshkilatining bash re'isi boldi. Tursunjan emet ependi mu'awin re'is, élshat islam ependi bash katip boldi. Uningdin bashqa teshwiqat, maliye we mupettish qatarliq sahelergimu muwapiq, dep qaralghan shexsler saylinip chiqti. Köpchilik birdek qol kötürüp bu saylamda wezipe tapshuruwalghan pidakarlarning himmitini tebriklidi.

Pa'aliyetke dunya Uyghur qurultiyining yaponiyede turushluq mu'awin re'isi ilham mexmut ependi, gérmaniyede turushluq mu'awin re'isi ümid agahi ependi we diniy ishlar re'isi turghunjan alawudun ependi qatarliqlar alahide teklip bilen kélip, nazaretchilik we yétekchilik salahiyitide qatnashti. Uningdin bashqa gollandiye türk fédératsiyesining amstérdam bölümide turushluq wekili murat gédik ependilermu keldi.

Pa'aliyet shu yer waqti 14 de bashlinip, 16 de axirlashti. Pa'aliyette yene gollandiye Uyghur birlikining qurulghandin buyanqi netijiliri mu'eyyenleshtürüldi we yéngidin wezipige teyinlen'gen mes'ulliri bundin kéyinki tirishchanliqliri bilen dewa ishlirigha töhpe qoshidighanliqini bildürdi.

Bash re'islikke saylan'ghan abdusalam niyaz ependi söz qilip: weten ichi-sirtida yüz bergen barliq weqelerni gollandiye hökümitidiki munasiwetlik orunlargha yetküzüsh we gollandiyediki Uyghurlarning ittipaqliqi üchün hesse qoshimen, dédi.

Pa'aliyette yene yéngidin wezipige teyinlen'gen mes'ullardin bashqa, dunya Uyghur qurultiyining wekilliri, yawropa sherqiy türkistan ma'arip jem'iyitining wekilliri we bashqa aktiplarmu söz qildi. Kéyin köpchilik birlikte xatire resimge chüshti we bu qétimliq wezipige teyinlen'gen yashlargha medet béridighanliqini bildürüp, ayliq yardem seperwerlikige awaz qoshti.

Pa'aliyet axirlashqandin kéyin, bir qisim wetendashlar dunya Uyghur qurultiyining wekillirige hemrah bolup, yawropa sherqiy türkistan ma'arip jem'iyitini ziyaret qilish üchün yürüp ketti.