Gollandiye Uyghur birliki wekilliri parlamént ezasi xarriy fan bommél bilen körüshti

Gollandiye Uyghur birliki teshkilatining wekilliri 9‏-mart düshenbe küni gollandiyening paytexti denhax shehiride gollandiye s p partiyisining mes'ulliri bilen uchrashti.

Parlamént binasida ötküzülgen söhbetning mezmuni Uyghurlar duch kéliwatqan mesililerge merkezleshken bolup, ziyaritimizni qobul qilghan gollandiye Uyghur birlikining wekilliri pa'aliyet heqqide melumat berdi.

Gollandiye Uyghur birlikining mu'awin re'isi bextiyar nasir ependining bildürüshiche, ular s p partiyisining parlamént ezasi xarriy fan bommél qatarliq wekilliri bilen körüshüp, ötken yili yüz bergen qanliq weqeler heqqide matériyallar sun'ghan we bundin kéyinki Uyghur dewasining tereqqiyati heqqide meslihetleshken. Tursunjan ependining éytishiche, parlamént ezasi xarriy fan bommélgha sunulghan matériyallarda 2014‏-yilidin hazirgha qeder yüz bergen weqeler, shularning ichidiki yeken qirghinchiliqi heqqidiki melumatlar, dunya Uyghur qurultiyi teyyarlighan 2014‏-yilliq doklatlar yer alghan.

Gollandiye Uyghur birlikining re'isi sadiqjan seley ependi, parlamént ezasi xarriy fan bommél ependige, ötken yillarda Uyghur dawasining tereqqiyati üchün köp küch chiqarghanliqini bildürüp ötkendin kéyin, bu qétimliq uchrishishta 2014‏-yil ichide yüz bergen weqelerning ötken yillardikidinmu éghir bolghanliqini bayan qilghan hemde rabiye qadir xanimning oghli ablikim bilen ilham toxti ependilerning xelq'araliq qanuniy yollar bilen azad qilinishi heqqidimu teklip sun'ghan.

Sadiqjan seley ependining éytishiche, xarriy fan bommél ependi tapshurup alghan doklatlarni gollandiye parlaménti bilen yawropa parlaméntida otturigha qoyidighanliqini bildürgen we Uyghur dewasining tereqqiyatigha paydiliq tekliplerni bergen. Uning bildürüshiche yene, gollandiyediki iltija ishliri ret qiliniwatqan Uyghurlargha bérilgen qararning toghra bolmay kéliwatqanliqi heqqidimu doklat sunulghan.

Parlamént ezasi xarriy fan bommél ependi ilgiri “ Uyghurlargha yardem bérish guruppisi” ni qurup chiqqan we uninggha özi bash bolup köpligen xizmetlerni qilghan idi. U hazir gollandiye s p partiyisining gholluq rehbiri, gollandiye tashqi ishlar ministirliqi we yawropa birlikining sözchisi qatarliq wezipilerni ötimekte. U, Uyghurlargha yardem bérip kéliwatqan birdinbir parlamént ezasidur.