Ormanchiliq nazaritining sabiq naziri memet abdullaning “Ikkiyüzlimichilik” sewebidin tutqunda ikenliki delillendi

Muxbirimiz shöhret hoshur
2018.12.06
ormanchiliq-nazariti-sabiq-naziri-memet-abdulla.jpg Uyghur aptonom rayonluq ormanchiliq nazaritining sabiq naziri memet abdulla ependi.
Oqurmen teminligen

Uyghur rayonida bulturdin bashlan'ghan atalmish “Ikkiyüzlimichilerge qarshi heriket” dolqunida Uyghur aptonom rayonluq ormanchiliq nazaritining sabiq naziri memet abdullaning bultur 5-ayda tutqun qilin'ghanliqi jem'iyet xewerliride tarqilip yürgen idi. Muxbirimizning Uyghur rayondiki her derijilik idare-organlargha qarita élip barghan éniqlashliri dawamida bu yil 68 yashqa kirgen, pénsiyege chiqqan nazir memet abdullaning “Ikkiyüzlimichilik” bilen eyiblinip tutqun qilin'ghanliqi delillendi.

Korlagha qarita élip barghan ehwal éniqlashlirimiz dawamida, korladiki melum bir emeldarning ürümchide tutqundiki ormanchiliq nazaritining naziri memet abdulla seweblik tutqun qilin'ghanliqi ashkarilandi. Melum bolushiche, bu yil 68 yashqa kirgen memet abdulla 1950-yili korlada tughulghan. 1983-Yilidin 1993-yilighiche korlada ikki nöwet sheher bashliqi bolup wezipe ötigen. U 1993-yilidin 1997-yilighiche korlada tarim wadisini bashqurush idarisining bashliqi bolghan. 1997-Yilidin 2008-yilighiche Uyghur aptonom rayonluq ormanchiliq nazaritining naziri bolup wezipe ötigen. 2008-Yili 3-aylarda dem élishqa chiqqan.

Biz ushbu xewerni anglighandin kéyin, ormanchiliq nazaritige téléfon qilduq. Nazarettiki nöwetchi xadim, sabiq nazir memet abdullaning tutqunda ikenlikini delillidi.

Korladiki weziyettin xewerdar kishiler memet abdullaning korlada sheher bashliqi we ormanchiliq nazaritige nazir mezgilide, etrapigha Uyghur kadirlarni köplep yighqanliqi, Uyghur kadirlarni muhim orunlargha muhim wezipige teyinligenliki üchün, ötken yilliq siyasiy dolqunda ikkiyüzlimichilik bilen eyiblen'genlikini ilgiri sürdi. Emma nazaretning nöwetchi xadimi, sabiq nazir memet abdullaning néme üchün tutulghanliqini jem'iyetke ashkarilashqa bolmaydighanliqini otturigha qoydi.

Muhajirettiki Uyghur közetküchiler da'irilerning adette ijtima'iy yaki iqtisadiy jinayet bilen eyiblen'genlerni jem'iyettin mexpiy tutmaydighanliqi, peqet siyasiy jinayetchilerningla qilmishini jem'iyettin sir tutidighanliqini ilgiri sürüp kelgen.

Nazaretning nöwetchi xadimi sabiq nazir memet abdullaning qachan we néme üchün tutulghanliqi heqqidiki so'alimizni izchil halda ret qildi. Memet abdullaning 8 yil burun pénsiyege chiqqanliqi we shuningdin kéyin uni körüp baqmighanliqini otturigha qoyghan mezkur xadim, memet abdullaning tutqun qilin'ghanliqi heqqide idaride omumyüzlük uqturush chiqirilghanliqinimu yoshurmidi.

Korladiki weziyettin xewerdar kishiler sabiq nazir memet abdullaning adette jama'etchilikke intayin étibar béridighan we jama'et pikirige hörmet qilidighan kishi ikenliki, shunga yurttiki diniy zat we yurt mötiwerliri bilen yéqin munasiwette bolup kelgenliki, yéqinqi yillarda tutqun qilin'ghan diniy zatlar arisida u yéqin ötken we resmiyet ishlirigha yardem qilghan diniy zatlarmu bolghanliqi üchün, uning “Ikkiyüzlimichilik” bilen eyiblen'genlikini otturigha qoydi. Emma ormanchiliq nazaritining alaqidar xadimi memet abdullaning néme üchün tutulghanliqini, nazaret partkomining intizam tekshürüsh bölüminingla jawab béreleydighanliqini tekitlidi.

Biz ormanchiliq nazaritining intizam tekshürüsh bölümige téléfon qilghinimizda, alaqidar xadim memet abdullaning tutqunda ikenlikini yoshurmidi, emma u xadim memet abdullaning délosini sirtqa ashkarilashqa bolmaydighanliqini tekitlidi.

Her ikki xadimning bayan qilishiche, memet abdullaning tutqun qilin'ghanliqi nazarettiki yighinlarda ashkara élan qilin'ghan. Shundaq turuqluq bu xadimlar, sabiq nazir memet abdulla heqqide aptonom rayonluq partkom intizam tekshürüsh komitétidin melumat sorishimizni tewsiye qildi. Téléfonimizni qobul qilghan her ikki xadim, memet abdullaning “Ikkiyüzlimichilik” bilen eyiblen'genliki heqqidiki uchurni ret qilmidi.

Yene korladiki weziyettin xewerdar kishilerning bayan qilishiche, memet abdulla korligha sheher bashliqi we ormanchiliq nazaritige nazir mezgilide birqanche qétim xizmet munasiwiti bilen, yawropa döletlirige ziyaretke chiqqan. Shunga weziyettin xewerdar kishiler memet abdullaning tutulushigha ene shu yawropa sayahitining seweb bolghanliqini ilgiri sürüshmekte. Yene beziler bolsa, uning 2008-, 2009-, 2013- we 2015-yilliri amérikida yashawatqan perzentlirini yoqlashqa barghanliqi we mushu ziyaret dawamidiki ijtima'iy alaqiliri sewebidin tutqun qilin'ghanliqini perez qilishmaqta.

Muhajirettiki Uyghur közetküchilirining qarishiche, xitay da'iriliri 2000-yillardin 2016-yiligha qeder Uyghur jem'iyitining diniy sahesige we xitaygha qarshi siyasiy meydani nisbeten ochuq bolghan kishilerge omumyüzlük zerbe bérip bolghandin kéyin, 2017-yildin bashlap, “Ikkiyüzlimichiler” ge qarshi turush nami astida, Uyghurlar ichidiki özliri hemkarliship kelgen emeldarlar, közge körün'gen tijaretchiler we ziyaliylarghimu zerbe bérishke ötken. Melum bolushiche nazir memet abdullabu zerbe dolqunida tutqun qilin'ghanliqi delillen'gen birqanche sabiq yuqiri derijilik emeldarlardin biridur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.