Tor saqchilirining agahlandurushini tapshuruwalghan yanfon ishletküchiler dekke-dükkide qalghan

Muxbirimiz qutlan
2015-11-24
Share
yanfon-uchur.jpg Uyghur élidiki bir qisim yanfon igiliri tor saqchiliridin jiddiy agahlandurush uchuri tapshuruwalghan. 2015-Yili noyabir.
AFP

Ötken hepte parizhda yüz bergen térrorluq hujumidin kéyin xitay tor saqchilirining Uyghur rayonidiki eqliy iqtidarliq yanfon we intérnét ishletküchilerge bolghan kontrolluqining hessilep kücheygenliki melum.

Xewer tépishimizche, 11-ayning deslepki heptisidin bashlap Uyghur rayonining merkiziy shehiri ürümchi hemde bashqa wilayet,nahiyelerdiki bir qisim yanfon igiliri tor saqchiliridin jiddiy agahlandurush uchuri tapshuruwalghan.

Mezkur tékist uchurida mundaq déyilgen: “Saqchi shuni alahide uqturiduki, yanfon mulazimitingiz qanun boyiche toxtitip qoyuldi. Saqchixana bilen derhal alaqilishing!”

“Nyuyork waqit géziti” mu aldinqi küni bu heqte mexsus xewer bérip, ürümchidiki nam-sheripini ashkarilashni xalimaydighan yanfon ishletküchilerning bayanliri arqiliq bu ehwalning rastliqini delilligen idi.

Biz bu heqte rayondiki Uyghur yanfon ishletküchilirining inkasini bilish üchün neq meydan'gha téléfon qilduq. Ürümchidin xoten'ge mal yötkep satidighan bir Uyghur tijaretchi özining aldinqi küni saqchidin jiddiy agahlandurush uchuri tapshuruwalghanliqini, dekke-dükke ichide télégraf bash shirkitige barghinida minglighan kishilerning öchirette turup kimlik uchurlirini qayta tizimlitiwatqanliqini bildürdi.

U ziyaritimiz jeryanida özining ilgiri ikki yanfoni barliqini, birini xotende öz kimliki bilen béjirgenlikini, yene birini ürümchidiki mal bilen teminleydighan xitay sodigerning öz nami bilen béjirip bergenlikini tilgha aldi.

Halbuki, uning ürümchide ishlitidighan yanfoni yéqinda tuyuqsiz toxtap qalghan.Saqchining telipi boyiche u télégraf bash shirkitige barghinida ikkinchi yanfonini öz kimliki bilen tizimlitishqa buyrulghan.

U yene hökümet organlirida xizmet qilidighan Uyghur xadimlarningmu yéqindin buyan dekke-dükkide qalghanliqini, özining tamgha basturush üchün yéqinda bir idarige barghinida u yerdiki Uyghur xadimlarning yanfonidiki uchurlarni yuyup-öchürüsh bilen aware boluwatqanliqini bayan qildi.

Biz bu heqte yenimu ilgirilep uchur élish üchün Uyghur rayonining bashqa jaylirighimu téléfon qilduq.

Aqsuning melum nahiyesidin ziyaritimizni qobul qilghan bir Uyghur ayal téléfon seweblik köp kishilerning tutup kétilgenlikini, yerlik da'irilerning téléfon ishletküchilerge yéngidin bir tutash simkart tarqitip bermekchi boluwatqanliqini ilgiri sürdi.

Awat nahiyesining melum yézisigha xizmet guruppisi bolup chüshken bir muqimliq kadirimu ikki hepte ilgiri ziyaritimizni qobul qilip téléfon seweblik oqush yéshidiki 3 balining késilip ketkenlikini ashkara qilghan idi.

U ziyaritimiz jeryanida, saqchilar bilen muqimliq kadirlirining qerelsiz halda yashlarning yanfonlirini tekshürüp turidighanliqini tilgha aldi.

Muhajirette yashawatqan Uyghurlarmu bu heqte radi'omiz ziyaritini qobul qilip yéqindin buyan yurtidiki uruq-tughqan we dost-buraderliri bilen téléfon alaqisi élip bérishning intayin qiyin boluwatqanliqini bildürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet