Istanbulda ötküzülgen yighinda birlik-barawerlikke chaqiriq qilindi

Sherqiy türkistan ma'arip we hemkarliq jem'iyitining qérindashliq uchrishish we söhbet yighinida diniy alim ibrahim damollam söz qilmaqta. 2016-Yili 4-mart, istanbul.

Merkizi istanbulgha jaylashqan sherqiy türkistan ma'arip we hemkarliq jem'iyitining uyushturushi bilen her ayda bir qétim ötküzülüp kéliwatqan qérindashliq uchrishish we söhbet yighinining 3-ayliqi 4-chésla jüme küni jem'iyet yighin zalida ötküzüldi.

Yighinda aldi bilen gollandiyede yashap alemdin ötken merhum abduraziq bayraq ependining rohigha atap du'a tilawet qilindi. Yighin'gha istanbulda yashawatqan Uyghurlardin köp sanda kishi qatnashti.

Yighin qur'an kerim tilawet qilish bilen bashlandi. Yighin'gha sherqiy türkistan ma'arip we hemkarliq jem'iyitining idare hey'et mes'ulliridin abdulxélil abit'oghli riyasetchilik qildi. Yighinda diniy alim abdulhekimxan mexsum hajim söz qilip qur'an kerimdin bir qanche ayetni tepsir qilip ötti.

Abdulhekimxan mexsum hajim sözide, birlik we barawerlik toghrisida toxtaldi we pidakarliq bilen xizmet qiliwatqanlarni hörmetlesh kéreklikini, öz-ara bir-birini hörmetligende küch hasil bolidighanliqini, birlik-barawerlik bolmaydiken, netijige érishkili bolmaydighanliqini, ghelibe we netijining achquchi birlik we barawerlikte ikenlikini tekitlidi.

Yighinda yene, diniy alim ibrahim damollam söz qilip birlik barawerlik we mes'uliyetni ada qilish, dawa yolida ishench bilen mustehkem turush toghrisida toxtaldi.

Ibrahim damollam yene, iman we ishench bilen dawa yolida ching turush ghelibige érishtüridighanliqini, iman we ishench bilen ching turghanda ümidsizlikni yoqitip ghelibige érishtüridighanliqini, meghlubiyetke uchrash mumkin emesilikini, ümid we ishench bilen ching turghanda az sanliqning köp sanliq üstidin ghelibe qilalaydighanliqini tekitlep qur'an kerim we islam tarixidin emeliy misallarni körsetti.

Yighin axirida köpchilik wetenperwer pa'aliyetchi abdul'eziz ependining du'agha qol kötürüshi bilen, xitayning türmiliride naheq yétiwatqan Uyghurlarning türmidin qutulushi we ulargha sebir taqet we salametlik tilep du'a qildi.

Yighinning aldi‏- keynide istanbulning yiraq-yéqinliridin kelgen Uyghurlar bir-biri bilen öz-ara qizghin salamlashti we hal ehwal sorashti. Yighin qizghin keypiyat ichide axirlashti.

Biz bu yighin toghrisida pikir qarashlirini élish üchün yighin'gha qatnashqan yashlardin sabir hajim bilen söhbet élip barduq. Sabir hajim bu yighindin köp paydilan'ghanliqini, her qétimqi yighinda meniwi ozuq éliwatqanliqini, qérindashlar ara uchrashqandin kéyin rohi keypiyatining yaxshi bolup qalidighanliqini ipadilidi.