Enqerede échilghan "Siyaset we istratégiye kursi" axirlashti

Ixtiyariy muxbirimiz erkin tarim
2018-12-28
Élxet
Pikir
Share
Print
Enqerede échilghan "Siyaset we istratégiye kursi" din bir körünüsh. 2018-Yili 28-dékabir. Enqere, türkiye.
Enqerede échilghan "Siyaset we istratégiye kursi" din bir körünüsh. 2018-Yili 28-dékabir. Enqere, türkiye.
RFA/Erkin Tarim

Türkiyening paytexti enqerediki Uyghur tetqiqat instituti yash mutexessis Uyghurlarni yétishtürüsh meqsitide "Siyaset we istratégiye kursi" achti. 12-Ayning 23-künidin 29-künigiche enqerediki institutning ishxanisida ötküzülgen kursqa gérmaniye, shiwétsiye we türkiyening herqaysi sheherliridin kelgen 20 Uyghur yash ishtirak qildi. Bular 20-35 yashlardiki aliy mektep püttürgen yaki doktorluq we magistirliq oquwatqan yashlar arisidin tallan'ghan.

Bir hepte dawamlashqan kursta derslerning köpini Uyghur tetqiqat instituti mudiri, istratégiye mutexessisi doktor erkin ekrem ependi ötti. Uningdin sirt kanadadiki Uyghur ziyaliysi ruqiye turdush xanim "Millet we milletchilik" témisida, enqerediki haji bayram uniwérsitéti oqutquchisi proféssor doktor qonur alip erjilasun ependi "Bashqilarning neziride Uyghurlar" témisida, zhurnalist adiljan eruyghur ependi bolsa "Biz kim? Uyghurmu? sherqiy türkistanliqmu? biz özimizni tonumduq? özimizni qandaq bayan qilishimiz kérek?" dégen témilarda ders berdi. Bulardin bashqa amérikidiki Uyghur adwokat nuri türkel ependi "Skayp" arqiliq "Qanun we xelq'ara qanun" témisida, iqtisadshunas muhemmetjan bughra "Iqtisad we soda: yüksiliwatqan xitayning küchi" témisida, shiwétsiyediki Uyghur yash nijat turghun ependi "Milliy mepkure we ijtima'iy qimmet qarash" témisida ders berdi. 

"Siyaset we istratégiye kursi" ning asasiy ders bergüchisi istratégiye mutexessisi doktor erkin ekrem bolup, u, "Dölet we siyaset: xelqlerning igilik hoquqi, döletler we xelq'ara munasiwet: gherbtin kelgen hakimiyetler ara munasiwetler, tarix we istratégiye, istratégiyilik tepekkur, xelq'ara sehnidiki özgirishler" dégen'ge oxshash témilarda ders berdi. 

Bir hepte dawamlashqan kurs qandaq ötti? institut kütken meqsitige yettimu? bu heqte köz-qarishini igilesh üchün kursni uyushturghan Uyghur tetqiqat instituti mudiri, istratégiye mutexessisi doktor erkin ekrem bilen söhbet élip barduq. Doktor erkin ekrem ependi xitay weziyitide zor özgirish bolghanliqini, bundaq bir weziyette, xelq'ara weziyetni xitay weziyitini, Uyghur weziyitini toghra chüshinip, pikir yürgüzeleydighan yash pa'aliyetchilerni yetküzüsh ikenlikini, buninggha kursning paydiliq bolghanliqini bayan qildi. 

Biz "Siyaset we istratégiye kursi" gha gérmaniyedin kélip qatnishiwatqan dunya Uyghur qurultiyining xizmetchi xadimi shehrizat gheyret xanimgha mikrofonimizni uzattuq. U, kursning özi üchün paydiliq bolghanliqini bolupmu Uyghur tarixi toghrisida bilmeydighan köp nersilerning barliqini hés qilghanliqini, bu kursta ularni öginiwalghanliqini bayan qildi. 

Biz "Siyaset we istratégiye kursi" gha türkiyening istanbul shehiridin kélip qatnashqan enwer semet ependige mikrofonimizni uzattuq. U, kursning özi üchün paydiliq bolghanliqini siyasiy we nezeriyiwi asasining öskenlikini, bashqa yashlarningmu qatnishishini tewsiye qilidighanliqini bayan qildi. 

Türkiyening qahramanmarash wilayitidiki sütchü imam uniwérsitéti oqughuchisi muhemmet atawulla ependi siyaset, istratégiye, tarix, iqtisad we qanun qatarliq penlerning chemberchas baghlan'ghanliqini, kursta bu derslerning hemmisini oqughanliqini, köp yéngi melumatlarni igiligenlikini otturigha qoydi. 

Qimmetlik radi'o anglighuchilar "Siyaset we istratégiye kursi" enqerediki Uyghur instituti achqan tunji qétimliq kurs bolup, bundin kéyin her yili ötküzülidiken. Undaqta qandaq oqughuchilar bu kursqa iltimas qilalaydu? doktor erkin ekrem ependi uniwérsitétni püttürgen, milliy rohqa ige, in'gliz tilini bilidighan 20 yashtin 35 yashqiche bolghan herqandaq Uyghurning iltimas qilalaydighanliqini bayan qildi.

Toluq bet